Provedora Direitu Umanu no Justisa (PDHJ), Jesuína Maria Ferreira Gomes. Imajen Tatoli/Dok.

DILI, 13 novembru 2020 (TATOLI)-Iha proposta Orsamentu Jerál Estadu (OJE) tinan fiskál 2021, Provedoria Direitu Umanu no Justisa (PDHJ) prevee  $1,857,468 hodi kobre ba nesesidade no planu prioridade PDHJ nian.

“PDHJ hetan pakote orsamentu ba 2021 ho montante $1,857,468 ne’ebé iha medida setoriál ba tinan oin mak hanesan tuir papél PDHJ nian mak halo investigasaun, promosaun liuhosi treinamentu ba PNTL, F-FDTL, funsionáriu públiku, guarda prizionál, komunidade  no halo fiskalizasaun simu keixa hodi halo rekomendasaun  ho mós peskiza,” Provedora PDHJ, Jesuina Maria Ferreira Gomes, hateten  ba Agência Tatoli, ohin, hafoin hala’o audiénsia ho Komisaun A-PN ne’ebé trata asuntu justisa no konstitusionál hodi aprezenta proposta OJE  PDHJ nian ba tinan 2021.

Hosi montante orsamentu ne’e koloka ba saláriu vensimentu $863,786, bens servisu $896,482, kapitál minor  $97,200  no kapitál dezenvolvimentu ho transferénsia públika laiha (-).

Nia hateten, orsamentu ne’e la sufisiente atu finansia atividade PDHJ tanba ne’e husu proposta adisionál  liu-liu ba servisu profisionál atu kontratu tékniku internasionál hakerek relatóriu komplementár iha area direitu umanu ho kalkulasaun kustu $80,000,00 no viajen lokál tanba PDHJ mós integra  ba atividade sosializasaun lei Medida Preventiva no Kombate Korrupsaun (MPCC) atu bele aumenta orsamentu maibé seidauk fixa nia montante.

Tuir dokumentu  livru Planu Asaun Nasionál medida prinsipál setoriál hosi  PDHJ ba tinan fiskál 2021 mak    Superviziona funsionamentu ba podér  públiku, submete ba Governu, Parlamentu Nasionál ka  kualkér instituisaun kompetente, ho baze konsultiva, paresér, rekomendasaun, proposta  no relatóriu kona-ba kualkér  matéria promosaun no protesaun direitu umanu ho boa governasaun.

Fiskaliza no verifika mós kompatibilidade ba kualkér lei, regulamentu, despaxu administrativu, polítika no pratika iha vigor ka kualkér proposta lejizlativa ho direitu internasionál kostumeiru no tratadu vijente iha matéria direitu umanu.

Rekomenda adosaun  lejizlasaun foun no propoin alterasaun  lejizlasaun vigora no adosaun  ka revizaun  medida administrativu. Ikus liu, asegura monitorizasaun  ba asuntu relasiona ho direitu umanu no boa governasaun ho investigasaun ho jere kazu violasaun ba direitu sira no promove  asaun formasaun ba kapasitasaun téknika no profisionál no promove    boa governasaun ho jestaun institusionál, fortalese kapasidade rekursu umanu.

Jornalista   : Neslon de Sousa

Editór        : Francisco Simões

HAKEREK NO HATÁN

Please enter your comment!
Please enter your name here