Saudozu Armando José Dorado da Silva “Mausurik Murak Rai” ho naran koñesidu “Fitun” husi liman loos foto hamutuk ho Kayrala Xanana Gusmão.Imajen Espesial.

DILI, 12 novembru 2020 (TATOLI)—Prezidente Interinu Organizasaun Fitun Rezisténsia, Salvadór Tilman, husu ba Governu no Estadu atu haloot Sadozu Armando José Dorado da Silva “Mausurik Murak Rai” ho naran koñesidu “Fitun iha Jardim Heroi Metinaro Dili.

“Hanesan ema rezisténsia, organizasaun no família ejize matebian tenke halo’ot iha semitériu Jardin dos Herois Metinaro,” nia hateten ba Tatoli, iha HNGV, kinta ne’e.

Saudozu Armando José Dorado da Silva “Mausurik Murak Rai” ho naran koñesidu “Fitun” iha loron 11 fulan novembru 2020 kalan ne’e hakotu ona iis iha Ospitál Nasionál Guido Valadares (HNGV-sigla portugés) tanba durante ne’e sofre moras stroke no hipertensaun.

Nia informa durante tinan rua ona matebian sofre moras stroke no hela de’it iha uma hodi halo tratamentu saúde ho ai-moruk tradisionál no mós husi médiku sira.

Tuir kronolojia iha loron 10 fulan-novembru kalan matebian hetan  moras derpente no família lori kedas ba HNGV, hodi halo internamentu tanba dotór sira deskobre katak matebian ho tensaun aas 200-resin, no iha loron 11 lorokraik tensaun komesa tuun hikas ba 139.

“Depois besik tuku hitu kalan nia tensaun tun tan ba 65 depois liu menutu balun tun tan ba 35 laiha tan ona esperansa atu salva ninia vida ikus mai iha tuku 20:00 kalan saudozu hakotu nia Iis,” nia esplika ba Tatoli iha HNGV, kinta ne’e.

Fundadór Organizasaun Fitun ne’e komesa involve iha vida polítika hodi forma organizasaun fitun iha loron 20 fulan-abríl 1988 hodi halibur joven lubuk iha Bairru Taibesi Suku Kuluhun hodi enkoraza joven sira atu luta ba liberta nasaun no povu Timor-Leste.

Nia esplika Saudozu mós hanesan autór ne’ebé hetan fiar husi Kayrala Xanana Gusmão hodi dezena bandeira FALINTIL ne’ebé to’o agora instituisaun F-FDTL uza.

“Depois ukun an saudozu harii fali Partidu Liberal  no hetan asentu iha eleisaun primeiru Governu konstitusionál, saudozu hetan nomeasaun nu’udar deputadu opozisaun iha asembleia konstituante hamutuk ho deputadu na’in 87 seluk hakerek lei inan ba nasaun ida ne’e,”tenik tan.

Salvadór triste tanba lakon figura di’ak ida ne’ebé durante ne’e sai mahon ba organizasaun fitun rezisténsia.

Matebian mós hanesan artista seniór ne’ebé mate husik hela fen ho oan na’in ida.

Jornalista : Tomé Amado

Editór:Agapito dos Santos 

HAKEREK NO HATÁN

Please enter your comment!
Please enter your name here