Primeiru-Ministru, Taur Matan Ruak, partisipa iha aprezentasaun TIC Timor kona-ba sistema identifikasaun únika, iha Palásiu Governu, kuarta (11/11). Imajen TATOLI/Egas Cristovão

DILI, 11 novembru 2020 (TATOLI)Agência de Tecnologia da Informação e Comunicação, Instituto Público (TIC) Timor I.P, hamutuk ho ekipa interministeriál halo aprezentasaun ba Governu kona-ba sistema identifikasaun úniku (identidade úniku) molok lori ba Konsellu Ministru (KM) semana oin.

Aprezentasaun ne’e akompaña husi Primeiru Ministru (PM), Taur Matan Ruak no Ministru Prezidénsia Konsellu Ministru, Fidelis Manuel Leite Magalhães.

Enkuantu, komisaun ne’e rasik lidera husi TIC Timor, ne’ebé aprezenta kona-ba opsaun ba inisiativa ne’e.

Ministru Fidelis informa, sistema ne’e importante tebes tanba sai hanesan ai-riin ba dezenvolvimentu governasaun eletróniku iha Timor-Leste inklui dudu ba modernizasaun.

“Iha aprezentasaun ne’e, TIC aprezenta opsaun tolu no halo diskusaun kle’an, espera iha semana tuir mai ekipa sei halo aprezentasaun ida ba Konsellu Ministru atu hili modelu roteiru no métodu implementasaun iha programa identifikasaun úniku,” Portavóz Governu ne’e dehan iha Palásiu Governu, kuarta ne’e.

Hafoin aprezentasaun, seidauk bele fó informasaun detallu ba opsaun tolu ne’ebé sei diskute tanba sei halo diskusaun kle’an iha reuniaun KM.

“Sistema ne’e kona-ba nesesidade atu halo komunikasaun entre sistema refere, liga ba atribuisaun identidade legál ou lae,” nia akresenta.

Ministru Prezidénsia Konsellu Ministru, Fidelis Manuel Leite Magalhães no Portavóz Governu. Imajen TATOLI/Egas Cristovão

Identidade legál hanesan rejistu moris, ne’ebé dokumentu hirak ne’e mantein nafatin iha sistema atuál maibé sistema identidade únika harii ho hanoin ida katak bele komunika ho sistema hotu (interligasaun), maibé foku atu asegura asesu serbisu ne’ebé maka Governu sei fó ba sidadaun.

“Serbisu hanesan ita-nia karta kondusaun, tanba ne’e iha futuru apoiu hirak ne’ebé Governu fó hanesan dadus impostu sei tama hotu iha sistema identidade únika ne’e,” nia esplika.

Identidade únika sei sai hanesan sumbriña ne’ebé maka ninia sistema funsiona ho sistema bináriu.

“Tanba ne’e, bainhira ema ida aprezenta númeru identifikasaun únika ba instituisaun ida maka informasaun sira ne’e karik selu impostu ou lae no ezemplu ida tan bainhira empreza ida rai osan iha banku, maka banku sei husu identidade únika no sira sei hatene katak ita bo’ot iha hela dívida pendente ruma ne’ebé seidauk selu,” nia hatutan.

Sistema ne’e sei aplika ba ema hotu, nune’e mós ba sidadaun estranjeiru sira iha Timór liuhosi vistu traballu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here