Diretór Jerál MD, Nuno de Carvalho dos Santos. Imajen TATOLI/Evaristo Soares Martins.

DILI, 11 novembru 2020 (TATOLI)—Ministériu Defeza (MD) propoin millaun $18-resin iha proposta-lei Orsamentu Jerál Estadu (OJE) tinan fiskál 2021.

Papél Ministériu Defeza nu’udar departamentu governamentál responsável ba konsesaun, ezekusaun, koordenasaun no avaliasaun polítika, definida no aprovada hosi Konsellu Ministru, iha área defeza nasional no kooperasaun militár, bazea ba artigu 2º Dekretu-Lei n.º 7/2019, 17 abríl.

Diretór Jerál Ministériu Defeza, Nuno de Carvalho dos Santos, esplika ba tinan 2021 ministériu iha programa prinsipál tolu mak hanesan defeza nasionál, implementa polítika jéneru no promove boa governasaun (governasaun di’ak) no jestaun institusionál.

“Hosi programa tolu ne’e, ami hamosu sub-programa lima (5) no atividade 20 iha área defeza-militár ba tinan 2021. Programa sira-n’e hamutuk ami propoin millaun $18-resin inklui kapitál dezenvolvimentu,” Diretór Jerál Ministériu Defeza, Nuno de Carvalho dos Santos, informa ba jornalista sira bainhira hala’o audiénsia ho Komisaun B (Negósiu Estranjeiru, Defeza no Seguransa) iha Parlamentu Nasionál, kuarta ne’e.

Medida prinisipál setoriál hosi Ministériu Defeza ba tinan fiskál 2021 mak promove, garante no salvaguarda defeza nasionál.

Hosi medida ida-ne’e sei halo rekrutamentu ba forsa foun, promove no mellora saúde jerál membru efetivu F-FDTL nian, partisipa ezersísiu kombinadu iha ámbitu kooperasaun tékniku militár no organizasaun internasionál

Iha media prinsipál dahuluk ne’e sei realiza operasaun ba garante estabilidade, seguransa, apoia populasaun, defeza rekursu naturál, promove melloramentu kondisaun militár liuhosi manutensaun, rekuperasaun instalasaun militár sira.

Nune’e mós halo melloramentu no manutensaun meiu transporte, ekipamentu no dezenvolvimentu kapasidade interna no dezenvolve sistema baze dadus lojístika ho kualidade.

Medida prinsipál setoriál daruak ne’e mós implementa polítika jéneru no medida prinsipál datoluk mak kontinua promove governasaun di’ak no jestaun institusionál iha ministériu refere.

Hosi medida prinsipál hirak ne’e, Ministériu Defeza (MD) propoin montante orsamentu $14,050,485 (la inklui kapitál dezenvolvimentu) ba tinan fiskál 2021, ne’ebé koloka ba saláriu vensimentu $1,366,835, bens servisu $8,298,649, kapitál minór $1,982,001, kapitál dezenvolvuimentu $2,403,000.

Alokasaun orsamentál kada programa mak hanesan programa ho kódigu 388 kona-ba defeza nasionál sei gasta $11,048,073, programa ho kódigu 412 kona-ba implementasaun polítika jéneru sei gasta $73,436 no programa ho kódigu 510 kona-ba boa governasaun no jestaun institusionál sei gasta $2,928,976.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here