Ofisiál F-FDTL iha selebrasaun Aniversáriu FALINTIL ba dala-44 iha Kuartél Jenerál Fatuhada, Dili, 20 Agostu 2019. Imajen Tatoli/António Gonçalves

DILI, 11 novembru 2020 (TATOLI)—Ministru Defeza (MD) lideradu Filomeno Paixão de Jesus, liuhosi Komandu Forsa Armada Libertasaun Nasionál Timor Leste-Forsa Defeza Timor-Leste (FALINTIL-F-FDTL) sei rekuruta membru F-FDTL foun hamutuk na’in-600 iha tinan fiskál 2021.

Ministru Defeza, Filomeno Paixão de Jesus, halo ona desizaun polítika ne’ebé prevee ona iha proposta-lei Orsamentu Jerál Estadu ba tinan fiskál 2021.

Bazea livru 1 (panorama orsamentál) previstu millaun $1.3 liuhosi kategoria saláriu vensimentu sei halo rekrumentu forsa foun iha 2021.

Diretór Jerál MD, Nuno de Carvalho dos Santos. Imajen TATOLI/Evaristo Soares Martins.

“Desizaun polítika iha ona katak 600 pesoa ita sei rekruta iha tinan fiskál 2021. Hosi rekrutamentu ne’ebé iha, ita pepara kondisaun hanesan haree ba infraestrutura, haree ba meiu sira, haree ba preparasaun no ekipamentu sira-ne’ebé iha hodi suporta prosesu rekrutamentu ne’e rasik,” Diretór Jerál Ministériu Defeza, Nuno de Carvalho dos Santos, informa ba jornalista sira, bainhira hala’o audiénsia ho Komisaun B (Negósiu Estranjeiru, Defeza no Seguransa), iha Parlamentu Nasionál, kuarta ne’e.

Diretór Jerál MD ne’e informa, bazea ba desizaun ne’e halo planu no programa iha ámbitu prosesu rekruttamentu ne’e.

Diretór Jerál Ministériu Defeza ne’e fó-sai katak, sei halo mós kritériu sira iha prosesu rekrutamentu ba timoroan sira-ne’ebé interese kompete iha vaga forsa foun ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here