Telekomunikasaun uza fibra óptika. Imajen/Espesiál

DILI, 11 novembru 2020 (TATOLI)-Governu prevee millaun $41,588 ba verba Fundu Infraestrutura (FI) iha proposta Lei Orsamentu Jerál (OJE) tinan fiskál 2021 hodi halo akizisaun ekipamentu informátika kabu submarinu (fibra óptika).

Vise Primeiru-Ministru (PM) no Ministru Planu no Ordenamentu, José Maria Reis, hateten ezekutivu deside prevee orsamentu ne’ebé liuhosi desizaun Konsellu Administrasaun Fundu Infraestrutura (KAFI) no Konsellu Ministru delibera no aprova projetu ligasaun kabu submarinu liga husi Austrália mai Timor-Leste.

“Ba ekipamentu informátika, ligadu ba fibra óptika, ita aloka  millaun $41,5 resin no hetan ona aprovasaun iha Konsellu Ministru hafoin tékniku sira aprezenta opsaun sira,” Vise PM hato’o kestaun ne’e hodi responde preokupasaun deputadu sira iha ámbitu audiénsia públika konjunta iha sala plenária Parlamentu Nasionál (PN), kuarta ne’e.

Ministériu Planu no Ordenamentu (MPO) inklui ministériu relevante sira hahú ona serbisu atu asegura ligasaun kabu submarinu.

Atuál Prezidente KAFI  ne’e informa, polítika dada kabu submarinu hosi Darwin mai Timor-Leste nu’udar prioridade Governu ho kooperasaun Governu Canberra, ho objetivu atu eleva kapasidade rede internet iha rai laran, tanba VIII Governu Konstitusionál mós iha programa e-goverment, ne’ebé bainhira atu realiza presiza iha liña internet ho lais.

Deputada Bankada Partidu Libertasaun Nasionál (PLP), Maria Angelina Lopes Sarmento, haktuir durante hala’o kontaktu eleitorál iha baze, povu nia nesesidade prioritáriu liu mak bee no saneamentu, maibé realidade iha área refere Governu tau millaun $3,449.

Daudaun ne’e, banda internet internasionál ho kapasidade 6 Gigabyte/segundu, ne’ebé fahe ba populasaun iha territóriu tomak atu asesu ba internet liuhosi operadór Timor Telecom, Telkomcel no Telemor.

Enkuantu, Governu liuhosi Ministériu Transporte no Komunikasaun (MTK)  aluga bandwith ho kapasidade 200 megabyte/segundu hodi fahe ba instituisaun Estadu sira hamutuk 140.

Governu iha ona planu atu atualiza husi kapasidade 200 megabyte/segundu ba 1 gigabyte/segundu, atubele ajuda bainhira seidauk iha rede fibra óptika.

Ministru José Reis sei esplika klaru liutan kona-ba asuntu ne’e iha loron 13 novembru bainhira halo audiénsia públika ho komisaun E (fundu infraestrutura).

Kada ministériu mak ezekuta orsamentu FI

Tuir Ministru Planu no Ordenamentu, orsamentu prevee iha FI atu ezekuta projetu no sei ezekuta direita hosi kada ministériu ho fiskalizasaun no obseravsaun husi MPO no Ajénsia Dezenvolvimentu Nasionál (ADN).

“Fundu infraestutura sira ne’ebé prevee iha Orsamentu Jerál Estadu 2021 ne’e, liña ministeriál sira mak atu kaer no ezekuta,” nia esklarese.

Orsamentu ne’ebé prevee iha FI, iha tinan fiskál 2021 ho montante millaun $339,6, kompostu hosi $32.000 ba saláriu no vensimentu, millaun $1,040 ba bens no servisu no millaun $338,5 ba kapitál dezenvolvimentu.

Husi verba ne’e prevee $60.000 ba boa governasaun no jestaun institusionál, setór agrikultura millaun $3,798, água no saneamentu millaun $3,449, dezenvolvimentu urbanu no rurál millaun $ 6,190, edifísiu públiku millaun $7,693, edifísiu edukasaun millaun $4,843, enérjia elétrika millaun $18,321.

Nune’e mós, millaun $4,844 iha saúde, seguransa no defeza millaun $13,884, solidariedade sosiál millaun $1, projetu tasi mane millaun $8,5, aeroportu millaun $19,843, preparasaun dezeñu no supervizaun ba projetu foun millaun $9,441.

Enkuantu, estrada millaun $105,2, ponte millaun $4,896, portu millaun $1,814, programa ba setór turizmu $652.000, programa empréstimu millaun $70,7, programa setór finansa millaun $2,905, KAFI millaun $1,011, programa manutensaun no reabilitasaun millaun $6,924.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here