Sekretáriu Estadu Kooperativa, Elizário Ferreira. Imajen TATOLI/António Gonçalves

DILI, 10 novembru 2020 (TATOLI)–Sekretaria Estadu Kooperativa (SEKoop) asina kontratu ho kompañia lokál hamutuk 12 atu hola produtu hodi fornese ba programa Cesta Bázika.

“Kompañia  hirak ne’e submete ona sira-nia proposta no prontu atu sai parseiru ho Sekretáriu Estadu Kooperativa hodi hola produtu no destribui ba komunidade. Sira presiza asina kontratu mak bele partisipa iha programa rekoperasaun ekonómika,” Sekretáriu Estadu Kooperativa, Elizário Ferreira hateten Agência TATOLI, tersa ne’e, iha edifísiu Akait, Dili.

Kompañia hirak ne’ebé partisipa maka Green Mota Ain, Paralel, Star World, Jumar, Haicsulor, Incanto, Aitula, Betulei, no seluk tan ne’ebé la temi naran kompañia.

Antes ne’e, SEKoop halo ona lansamentu ba programa Cesta Bázika iha munisípiu Suai ho Kompañia sira, daudaun kontrata tan no tuir planu sei aumenta.

“Kompañia ida ka rua de’it sei labele kobre munisípiu neen ne’ebé SEKoop maka toma konta, tanba ne’e sé de’it mak prontu atu koopera ba implementasaun programa Governu, maka ami mós prontu koopera ho hanoin katak sira-nia partisipasaun ne’e bele kontribui atu hadi’a ekonomia povu,” Elizário esplika.

SEKoop sei distribui produtu ba komunidade iha munisípiu Covalima, Ainaro, Manufahi, Aileu, Manatuto no Lospalos.

Iha fatin hanesan, emprezáriu timor-oan, Oscar Lima (Betulei), ne’ebé mós asina kontratu ho SEKoop hateten, nia parte prontu atu kolabora ho Governu atubele fó susesu ba programa ne’e, ne’ebé sei ba sosa no distribui produtu ba komunidade.

“Emprezáriu sira bele ajuda halo serbisu ba Cesta Bázika, ne’e buat ida todan no ema barak tenke serbisu atubele atinje objetivu ne’ebé Governu hakarak,” nia dehan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here