Sekretáriu Jerál CNJTL, Mateus Lemos Soares. Imajen TATOLI/Osória Marques.

DILI, 10 novembru 2020 (TATOLI)—Sekretáriu Jerál Conselho Nacional Juventude Timor-Leste (CNJTL-sigla portugés), Mateus Lemos Soares, hateten CNJTL fó formasaun estratéjiku sira liuliu fó formasaun integradu hanesan formasaun ba lideransa, formasaun língua no edukasaun sidadania ka sívika ba jovén sira.

“Durante ne’e CNJTL fó formasaun ba jovén sira kona-ba formasaun lideransa, língua inklui ho edukasaun sívika ba joven sira,” Sekretáriu Jerál Conselho Nacional Juventude Timor Leste (CNJTL-sigla portugés), Mateus Lemos Soares, dehan ba Agência TATOLI iha nia knaar fatin, Faról, Dili, segunda ne’e.

Nia hatutan, aleinde ida ne’e iha mós formasaun ba sira ne’ebé mak halo negósiu atu oinsá mak negosiante sira ne’e bele halo negósiu ho di’ak no bele dezenvolve sira-nia moris loron-loron nian.

Nune’e, CNJTL hakarak fó formasaun hodi forma ema ho rekursu umanu liuliu iha área língua atu bele iha kuñesementu hodi nune’e bele kompete iha merkadu internasionál bainhira joven sira ne’e-servisu iha ema-nia rain.

Sekretáriu Jerál CNJTL, Mateus Lemos Soares. IMAJEN TATOLI/Osória Marques.

Tanba, nia hateten, papél CNJTL sai parseiru dezenvolvimentu ba implementasaun polítika nasionál iha Timor-Leste ne’ebé liga ba pilár lima (5) importante no pilar lima (5) ne’e CNJTL konsege realiza hamutuk ho Governu ne’ebé sai bázika dokumentu ida ba enkuadramentu.

Pilár dahuluk mak liga juventude ho edukasaun formál, edukasaun naun formál no edukasaun maihosi família. Pilár hirak ne’e iha ka estabelese hodi Governu bele investe.

Pilár daruak mak joven liga ho moris saudável ne’e servisu hamutuk ho Ministériu Saúde (MS). Tanba realidade ne’ebé iha mak má nutrisaun kontinua akontese nune’e MS presiza tau-matan hodi ema moris ho saudável.

Pilár datoluk mak joven liga ho empregu no dezempregu, hosi pilár ne’e CNJTL hakarak Governu investe kampu traballu ba joven sira entaun ho pilár ne’e bele ajuda juventude sira atu bele hetan servisu. Maibé liuhosi nia estudu formál no naun formál nia bele halo inovasaun ba nia-aan hodi kria mesak kampu traballu la presiza tenke Governu.

Nia dehan Estadu tenke hahú investe ona kampu traballu ba joven maibé importante mak CNJTL nafatin enkoraja joven feto-mane ne’ebé hola parte ativa iha dezenvolvimentu ne’e.

Pilár dahaat mak joven ho partisipasaun sívika tanba iha konstituisaun rasik hatete katak fó garantia ba joven sira. Entaun iha pilár ne’e CNJTL fó kedas espasu no garantia partisipasaun sívika joven sira-nian tantu iha ámbitu polítika ka palku polítika tanba liuhosi ne’e mak eduka joven hodi oinsá nia mós bele hola parte foti desizaun iha prosesu demokratiazasaun.

Pilár dalimak mak krime no violénsia katak polítika saida mak hadook joven sira hosi krime organizadu hosi joven sira ka hadook joven sira hosi krime. Hosi pilár ne’e CNJTL servisu hamutuk Sekretáriu Estadu Juventude no Desportu (SEJD) atu oinsá mak bele minimiza krime iha rai-laran.

Tanba CNJTL ho nia misaun ho vizaun ida katak promosaun profisionál ba juventude iha área oioin; Promove valór kultura hodi konserva identidade nasionál; promove edukasaun sívika ba futuru lideransa juventude iha nasaun Timor Leste; hasa’e koñesementu juventude iha prosesu hari’I dame no hametin unidade nasionál no hasa’e ekonómia juventude liuhosi kriasaun kooperativa.

Jornalista: Osória Marques

Editor: Cancio Xiemenes

PUBLISIDADEiklan

HAKEREK NO HATÁN

Please enter your comment!
Please enter your name here