Imajen/Espesiál.

REINU UNIDU, 09 novembru 2020 (TATOLI)—Timoroan iha diaspora husu Governu Timor-Leste atu kontinua tau matan no dignifika sira hanesan timoroan relasiona ho linguajen dezumana ne’ebé hato’o hosi timoroan balun iha instituisaun Estadu liuhosi karta formál, ne’ebé hatun maka’as loos timoroan iha diaspora nia dignidade.

Tuir reportajen Kontribuiente TATOLI iha Reinu Unidu, Dalia Agostinho, haktuir iha 30 outubru 2020, organizasaun komunitária hanesan TAIS Irlanda do Norte, Komunidade Timorense Peterborough, Assosiasaun Salurik Timor Inglaterra, Komunidade Timorense Bristol, Komunidade Timorense Bridgwater, Komunidade Timorense Cambridgeshire, Comite 12 Novembro Diaspora no Asosiasaun Desportiva Timorense-UK  hato’o ona karta protesta dirije ba Ministra Negósiu Estranjeiru no Kooperasaun liuhosi karta elektronika (email) diretamente ba Diretór Konsulár no Portokolár Ministériu Negósiu Estranjeiru no Kooperasaun (MNEK), Juvencio Martins, relasiona ho linguajen dezumana ne’ebé hatun timoroan nia dignidade.

Reprezentante timoroan iha Reinu Unidu hosi organizasaun komunitária, desportiva, kulturál no relijioza halo karta protesta ne’e nu’udar deklarasaun konjunta asina hosi prezidente ida-idak hosi organizasaun hitu (7) refere iha UK, ne’ebé hato’o pontu importante ne’en (6) hanesan tuir mai ne’e:

  1. Ami-nia solidáriu ba timoroan hotu iha diaspora ne’ebé sente ofendidu ho frase “…esses cavalos-marinhos trabalham e vivem na Inglaterra, Irlanda e Portugal ou “kuda laut” hirak ne’e servisu no hela iha Inglaterra, Irlanda no Portugal…”;
  2. Ami nia apresiasaun no agradese ba Governu Timor-Leste ne’ebé finalmente haruka timoroan 161 sai hosi Timor mai Europa iha loron 28 outubru 2020 hodi hadia sira-nia moris, tulun sira-nia família no ikus mai sei kontribui mós ba ekonómia rai doben Timor-Leste;
  3. Ami ezije Estadu Timor-Leste atu konsidera no rekoñese timoroan iha diaspora nu’udar parseiru ba ekonómia nasionál. Ne’eduni la merese atu hetan tratamentu Dezigual, Dezrespeitu no Dezumanu hosi sé-sé de’it;
  4. Ami husu profísionalizmu, prestasaun servisu kualidade no dignu ba sidadaun hotu-hotu lahó diskriminasaun;
  5. Ami ezije investigasaun profunda kona-ba linguajen iha karta ofisiál ne’e, se ne’e “erro administrativo ka de proposito?”;
  6. Ikus liu, iha momentu oportunu ida-ne’e, ami husu ba Sua Eselénsia no Embaixada Timor-Leste iha Londres atu haruka ekipa teknika hosi MNEK no Ministériu Justisa URGENTEMENTE mai Reinu Unidu hodi halo “renovasaun passaporte RDTL ba sidadaun Timorense ne’ebé kadukadu ona”. Atualmente rejistu iha Inglaterra no Irlanda do Norte Timoroan inklui labarik ki’ik aprosimadamente 450 presiza urjente renovasaun dokumentu Timor tanba períodu tranzisaun UK hamutuk ho EU falta fulan rua ramata ona.

Kontribuente: Dalia Agostinho

Editór: Cancio Ximenes

HAKEREK NO HATÁN

Please enter your comment!
Please enter your name here