Ministru Prezidénsia Konsellu Ministru, Fidelis Manuel Leite Magalhães. Imajen Tatoli/Egas Cristovão

DILI, 09 novembru 2020 (TATOLI)—Prezidénsia Konsellu Ministru (PCM-sigla portugés) lideradu Fidelis Manuel Leite Magalhães, propoin $5,022,647 ba tinan fiskál 2021.

Montante orsamentu ne’e koloka ba saláriu no vensimentu $521,840, bens (sasán) no servisu $ 4,400,807 no kapitál minór $ 100,000,

Ministru Prezidénsia Konsellu Ministru, Fidelis Manuel Leite Magalhães justifika ona montante orsamentu ne’e ba Komisaun A (Justisa no Konstitusionál) liuhosi audiénsia públika.

PCM-nu’udar departamentu sentrál Governu nian ho misaun presta apoia ba Konsellu Ministru no ba Primeiru-Ministru, promove koordenasaun interministeriál Governu nian.

Medida pinsipál setoriál hosi PCM ba 2021 mak kuida komunikasaun institusionál Governu nian, informa ba sosiedade sivíl kona-na atividade governamentál, promove sidadania, asegura monitorizasaun no halo akompañamentu ba entidade públika ne’ebé tutela iha PCM.

PCM mós kontinua prioritiza divulgasaun atos ofisiál no fornesimentu produtu, servisu ba setór públiku no privadu liuhosi Imprensa Nasionál Timor-Leste (INTL-sigla portugés).

“PCM Apoia elaborasaun projetu inovasaun administrativa ba Governu Eletróniku (eGovernment) no halo tradusaun kona-ba desizaun judisiál no dokumentu divulgasaun lei no halo konsulta públika. PCM halo konsentrasaun hotu-hotu ba atribuisaun matéria reforma lejizlativa, prosesu lejizlativu no  reforma administrativa,” refere planu medida prinsipál setoriál hosi PCM ne’ebé previstu iha livru planu asaun anuál.

PCM sei reforsa boa governasaun no jestaun institusionál o servisu tutela sira, promove nesesária parséria no kapasita rekursu umanu.

Iha tinan 2020, PCM aprezenta estimativa forsa traballu serka 74 pesoa, 12 kargu dirasaun xefia inklui funsionáriu na’in-8 nomeasaun polítika, bazea ba Dekretu-Lei 27/2016) no 13 ajente administrasaun públika atuál.

Entretantu Prezidente Komisaun A (Justisa no Konstitusionál), Deputadu Joaquim dos Santos, informa durante audiénsia ne’e ko’alia kona-ba despeza OJE 2020 nian ho montante millaun $3-resin maibé iha 2021 PCM nia osan sa’e ba millaun $5-resin.

“Diferensa entre 2020 no 2021 ne’e 30% aumenta. Razaun sira aumenta ne’e tanba iha mudansa sistema. Uluk ita-nia sistema orsamentu kada estrutura orágika Governu nian depois mak projeta ba atividade sira mibé orsamentu 2021 ne’e aloka kada programa depois mak aloka ba dirasaun sira,” Prezidente Komisaun A informa ba jornalista sira, iha Parlamentu Nasionál, segunda ne’e.

Jornalista: Evaristo Soares Martins

Editór: Cancio Ximenes 

HAKEREK NO HATÁN

Please enter your comment!
Please enter your name here