Diálogu entre MPM hamutuk ho entidade relevante hodi nasionál no komunidade lokál, iha salaun enkontru munisípiu Covalima, segunda (09/11). Imajen TATOLI/Antónia Gusmão

COVALIMA, 09 novembru 2020 (TATOLI)—Ministériu Petróleu no Minerál (MPM) ninia vizaun no misaun maka kontinua jere no dezenvolve rekursu petrolífera atu garante dezenvolvimentu sustentável.

“Vizaun estratéjiku ne’e luan tebes, entaun ita-nia riku-soin ne’ebé daudaun esplora, labele egoista katak, buat ne’ebé ita hasai hosi rai-laran ne’e ita halo mohu hotu kedan. Entaun, dezenvolvimentu hanesan ne’e la’ós dezenvolvomentu Sustentável,” Ministru Petróleu no Minerál, Victor da Conceição Soares, hateten iha aprezentasaun polítika petrolíferu ba autoridade munisipál, iha salaun enkontru munisípiu Covalima, segunda ne’e.

Membru ezekutivu ne’e esplika, dezenvolvimentu sustentável ne’e signifika, bainhira país atu konserva rikusoin ne’ebé hetan iha tempu ohin loron, tenke rai hela ba jerasaun sira tuir mai.

Nia fó ezemplu katak, bainhira Governu iha osan oituan mak halo mohu hotu kedan, maka la’ós Governu ne’ebé di’ak tanba haree de’it ba an no la hanoin ba ninia jerasaun tuir mai.

Tanba ne’e, Ministru ne’e subliña, misaun MPM hanesan órgaun governamentál ne’ebé sai responsável atu halo ezekusaun ba polítika enerjétika, ne’ebé bainhira iha kualkér polítika ne’ebé iha valór enerjétika bele konverte ba valór ekonómiku, tantu enerjia minarai no gás.

“Ko’alia kona-ba polítika enerjétika, la’ós minarai ho gás de’it, tanba rekursu minerál tempu to’o sei maran. Entaun, tenke iha enerjia alternativa ne’ebé nunka hotu. Ida-ne’e mak enerjia loro-matan, anin, bee-manas, no seluk tan. Tanba ne’e Governu iha obrigasaun atu dezenvolve hanesan alternativu,” nia esplika.

Nia mós nota katak nasaun sira ne’ebé uluk moris de’it ho mina rai, agora monu hotu ona, tanba ne’e presiza haree alternativa.

“Daudaun empreza Timor Resources hakarak hahú ona halo perfurasaun, nune’e posibilidade tinan oin iha ona kresimentu ekonómiku,” nia akresenta.

Kompañia Timor Resources sei halo perfurasaun ba mina-matan iha rai-maran área Betano no Manufahi iha bloku lima.

Atividade iha bloku hirak ne’e hahú ona iha tinan-2017, ho peskiza jeolójiku no estudu sira seluk no iha outubru 2018 hala’o ona teste sízmiku sira iha Bloku A.

Daudaun ne’e, fundu úniku Timor-Leste maka petrolífera, ne’ebé Banco Central de Timor-Leste (BCTL) fó sai relatóriu iha trimestre datoluk, kapitál fundu hamutuk biliaun $18,47.

Iha trimestre datoluk, hetan kontribuisaun hosi kontadu brutu fundu hosi kontribuinte no royalties hamutuk millaun $43,53.

Aleinde ne’e, hetan mós kontribuisaun hosi reseita doméstika, ne’ebé kada tinan la liu hosi millaun $200.

Jornalista: Antónia Gusmão

Editora: Júlia Chatarina

HAKEREK NO HATÁN

Please enter your comment!
Please enter your name here