Jornalista Agência TATOLI, Antónia Gusmão halo entrevista ho Xefe Gabinete Primeiru-Ministru, Azevedo Maçal, iha resintu PN, sesta (06/11). Imajen TATOLI/Evaristo Martins

DILI, 06 novembru 2020 (TATOLI)-Iha proposta Orsamentu Jerál Estadu (OJE) ba tinan fiskál 2021, Gabinete Primeiru-Ministru (GPM) prevee millaun $10,266.

“Orsamentu ne’e sei korresponde ba programa boot haat iha governasaun hanesan reforma estratéjika Estadu, apoiu sosiedade sivíl, planeamentu, monitorizasaun, no avaliasaun no programa ikus mak boa governasaun no reforma institusionál,” Xefe Gabinete Primeiru-Ministru, Azevedo Marçal, informa ba Agência TATOLI hafoin ramata audiénsia públika ho Komisaun A iha sala konferénsia Parlamentu Nasionál (PN), sesta ne’e.

Alokasaun orsamentu ba GPM hamutuk $10.266.544, fahe ba kategoria saláriu no vensimentu $506.233, bens no serbisu $3.208.489, kapitál menór $334.252, kapitál dezenvolvimentu $315.000, no transferénsia públika $5.902.580.

Orsamentu instituisaun ne’e mantein maibé iha mudansa ba ajénsia autónomu seluk hanesan Muzeu Rezisténsia ne’ebé iha pedidu adisionál ba konstrusaun edifísiu.

Aleinde ne’e sei aloka verba balun ba medida prinsipál setór hitu iha proposta OJE 2021 ba GPM.

Tuir livru orsamentu, medida prinsipál setór hitu maka hanesan reforsa governasaun liuhosi reuniaun regulár konsellu ministru, partisipasaun iha PN, asegura sólida reforma lejizlativa responsável pontu vista fiskál no reforsa relasaun esterna liuhosi Asosiasaun Nasaun Sudeste Aziátiku (ASEAN, sigla inglés) no Komunidade País ho lian Portugés (CPLP, sigla portugés).

Seluk mak promove páz no seguransa iha territóriu liuhosi sistema koordenasaun ida integradu ba ekonomia lokál, promove reforma iha área planeamentu, monitorizasaun no avaliasaun hodi fortalese prosesu alokasaun rekursu públiku bazeia ba rezultadu foti desizaun.

Nune’e mós, asegura kontinuidade promosaun reforma estratéjika Estadu, promove abordajen integrada reforma liuhosi supervizaun reforma jestaun finansa públika inklui reforma fiskál iha administrasaun públika, hodi konstrui administrasaun públika ida efisiente no efikáz, apoiu kontinuamente sosiedade sivíl hodi halo promosaun inkluziva hodi dezenvolve nasaun no ikus liu reforsa boa governasaun no jestaun institusionál.

Iha programa reforma estratéjika Estadu, prevee iha kategoria bens no serbisu  ho totál verba $544.400 no kapitál dezenvolvimentu ho valór $315.000, nune’e totál hamutuk $859.400 (8,4%).

Nune’e mós, apoiu sosiedade sivíl aloka iha kategoria bens no serbisu hamutuk $274.050 no transferénsia públika $5.902.250, ho totál hosi kategoria rua ne’e hamutuk $6.176.630 (60,2%).

Enkuantu, iha programa planeamentu, monitorizsaun no avaliasaun aloka iha kategoria bens no serbisu ho valór $358.512 (3,5%).

Programa boa governasaun alokadu iha kategoria salário no vensimentu hamutuk $506.233, iha kategoria bens no serbisu $2.031.527 no kategoria kapitál menór $334.252, totál hamutuk $2.872.012 (28%).

Tetu agregadu no dezagregadu proposta OJE 2021 ho montante bilian $1,895, fahe ba ketegoria saláriu no vensimentu millaun $239,26, bens no serbisu millaun $421,49, transferénsia públika millaun $669,91, kapitál menór millaun $61,14, no kapitál dezenvolvimentu millaun $503,20.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here