Kongresu Asosiasaun ICT-TL ba daruak iha kampus IOB, Fomentu Dili, sesta (06/11). Imajen TATOLI/António Gonçalves

DILI, 06 novembru 2020 (TATOLI)Asosiasaun Informasaun, Komunikasaun no Teknolojia Timor-Leste (ICT-TL, sigla portugés), realiza kongresu daruak ho tema ‘konsolida rekursu hodi konkretiza papél teknolojia informasaun no komunikasaun iha dezenvolvimentu nasionál’ durante loron rua, hahú 05 to’o 06 novembru.

Tuir Prezidente Komisaun Organizadora, Natálio Raimundo Soares, pápel asosiasaun nian mak fó advokasia ba públiku relasiona ho dezenvolvimentu setór ICT, nune’e sosiedade bele hatene kestaun sira kona-ba área ne’e.

“Formalmentu hosi asosiasaun ladún fó advokasia maibé pesoál sira ne’ebé hola parte iha asosiasaun dalabarak tenta ko’alia no hakerek artigu sira hodi konsensializa pápel ICT ba sosiedade,” Prezidente tenik iha salaun enkontru Institute of Bussiness (IOB), Fomento, sesta ne’e.

Daudaun asosiasaun ne’e iha ona membru hamutuk 500 resin, ne’ebé balun serbisu hanesan profisionál iha área informátika iha instituisaun públiku no privadu, no balun hanesan akadémiku.

Iha fatin hanesan, Prezidente Asosiasaun ICT-TL, Abel Pires da Silva, hateten situasaun atuál halo profisionál informátika sira presiza konsolida rekursu iha Timor-Leste liuhosi kongresu.

“Situasaun COVID-19 no projetu Governu kona-ba kabu submarinu hosi Timor-Leste ba Austrália eziji dezenvolvimentu boot tebes no bainhira atu fasilita setór hanesan edukasaun, saúde, agrikultura no turizmu presiza konsolida ema iha área informasaun teknolojia iha Timor-Leste tanba ita sei la lori ema hosi li’ur dezenvolve área ne’e iha Timór,” Abel Pires dehan.

Tanba ne’e, nia konsidera kongresu hanesan oportunidade ida ba asosiasaun hodi halibur hanoin no rekursu atu bele konvense parte ezekutivu sira.

Aleinde kongresu, iha mós espozisaun dijitál, kompetisaun PUBG, Blog no Vlog inklui semináriu ho tema financial technologies revolution, E-Government Timor-Leste no seluk tan.

Atividade ikus liu, kongresista sira sei halo diskusaun rejimentu estatutu asosiasaun no sei hili estrutura foun ba periúdu tinan-haat.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here