Arkivu Muzeu Rezisténsia Timor-Leste (AMRT). Imajen/Espesiál.

DILI, 06 novembru 2020 (TATOLI)—Arkivu no Múzeu Rezisténsia Timor-Leste (AMRT-sigla portugés) prioritiza sistema jestaun ba arkivu istóriku sira iha tinan fiskál 2021.

Papél Arkivu no Múzeu Rezisténsia Timor-Leste (AMRT), I.P iha misaun prinsipál mak prezerva, valoriza no divulga memória rezisténsia no kultura povu timorense nian.

Atu kumprimenta ba misaun ne’e, AMRT dezenvolve atividade konservasaun, organizasaun no disponibilizasaun respetivu fundu dokumentál, organiza no promove inidiativa divulgasaun públika no apoia atividade ne’ebé kontribui ba valorizasaun memória rezisténsia nasionál.

Bazea ba livru 2 (Planu Asaun Anuál) previstu medida prinsipál setoriál ba tinan fiskál 2021 sei halo peskiza no dezenvolve istória rezisténsia nasionál.

Nune’e mós realiza espozisaun temporária kona-ba istória reszisténsia no kultura timorense, kontinua servisu hodi asegura abrigu prezervadu lokál istóriku rezisténsia Timorense nian.

“Iha tinan fiskál 2021 instala sistema jestaun arkivu istóriku hodi apoia peskiza istórika iha sala Leitura AMRT nian no biblioteka,” dokumentu orsamentu ne’ebé sita iha livru Planu Asaun Anuál ne’e haktuir.

Iha tinan fiskál 2021, AMRT garante funsionamentu estúdiu produsaun multimédia permanente, realiza estudu komparativu no formasaun espesífika iha área jestaun, istória, muzeulojia, audiovizuál no diversidade kulturál ba nasaun no estranjeiru.

Iha proposta-lei OJE 2021, AMRT identifika no reabilita abrigu no fatin istóriku rezisténsia nian, realiza prosedimentu projetu konstrusaun jardín da Chama Eterna dedikada ba erói sira luta ba libertasaun nasionál, kria parseria ho instituisaun públika no privada sira hodi intensifika no fasilita ezekusaun programa AMRT nian no promove boa governasaun no jestaun institusionál, fortalese kapasidade rekursu umanu.

Hosi medida prinsipál hirak ne’e AMRT propoin orsamentu montante $2,476,356 kompostu hosi bens no servisu $2,242,356 no kapitál minór $234,000.

Entretantu, ohin AMRT ne’ebé tutela iha Gabiente Primeiru-Ministru (GPM) halo audiénsia públika ho Komisaun A (Justisa no Konstitusionál) hodi argumenta montante orsamentu hirak ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here