Vise-Ministru Turismu, Komérsiu no Indústria, Domingos Lopes Antunes. Imajen TATOLI/Egas Cristovão

BOBONARO, 05 novembru 2020 (TATOLI)—Nu’udar ministériu implementadór iha programa distribuisaun Cesta Bázika, Ministériu Turizmu, Komérsiu no Indústria (MTKI) identifika ona loja atu komunidade iha munisípiu Dili bele troka voucher ba produtu.

Tuir Vise-Ministru Turizmu, Komérsiu no Indústria, Domingos Lopes Antunes, distribuisaun posibilidade sei realiza fulan ne’e.

“Loja sira tuir ráziu ne’ebé maka halo tentativa hamutuk 10 maka parte ministériu identifika ona, entaun ho totál populasaun iha Dili hamutuk 340.000, ita halo maizumenus ema na’in 20.000 to’o 40.000 bele ba loja ida, tanba labele hobur iha loja ida de’it. Tanba ne’e ami kontinua buka ráziu loja hira maka atu troka voucher,” Vise-Ministru informa iha aldeia Palaka, munisípiu Bobonaro, kinta ne’e.

Daudaun ne’e ekipa téknika MTKI halo preparasaun ba distribuisaun voucher Cesta Bázika hodi bele troka iha loja ne’ebé Governu indika ona.

“Preparativu la’o hela no ami sei prepara sistema dijitál no dezeñu voucher, haree mós ba númeru úniku, ne’e serbisu boot ida,” nia akresenta.

Governante ne’e esplika, razaun Governu implementa voucher iha munisípiu Dili tanba lakohi ema ba forma naruk.

Aleinde ne’e, produtu ne’ebé distribui la’ós de’it ai-han maibé nesesidade bázika seluk.

“Ita atu promove produtu lokál, maibé iha ámbitu COVID-19 no Estadu Emerjénsia, iha medida balun ba saúde públika ne’ebé mensiona tipu sasán hanesan sabonete, sabaun fase liman, pasta dente, deterjente no sasán seluk tan, ne’ebé bele kontinua suporta prátika ijiene,” nia akresenta.

Aplikasaun programa ne’e universál, hosi labarik bebé to’o ema bo’ot, tanba ne’e sasán ne’ebé atu troka iha loja sei kualidade.

Biban ne’e, Vise-Ministru rejeita informasaun loja balun ne’ebé MTKI indika ona envolve iha troka voucher Cesta Bázika dada-an.

Programa Cesta Bázika destina ba membru idaidak agregadu familiár sei hetan produtu ai-han lokál ho valór $25 iha munisípiu sira, enkuantu iha Dili sei hetan voucher ne’ebé bele troka ho sasán iha loja ne’ebé korresponde ba valór osan $25, ba kada fulan durante fulan-rua nia laran.

Ba planu kurtu prazu iha tinan ne’e, Governu implementa medida haat ho kustu totál millaun $113,4, hanaran mitigasaun impaktu ekonómiku no sosiál ba krize COVID-19, ho objetivu esensiál atu haree ba postu traballu ezistente antes krize no rekupera rendimentu família liuhosi hadi’a empregu no apoiu direitu sidadaun no empreza iha merkadu inklui normaliza hikas atividade ekonómika.

Hosi medida haat ne’e, inklui hotu ho Cesta Bázika ba família, ho totál kustu ba implementasaun hamutuk millaun $71,5 (valór bele iha mudansa) ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here