Prezidente Konsellu Executivo INCT, Jose Cornelio Guterres. Tatoli/ Egas Cristóvão

DILI, 05 outubru 2020 (TATOLI)—Institutu Nasionál Siénsia Teknolojia (INCT-sigla portugés) iha planu prioridade lima ba 2021 maka sei halo peskiza ba área ekonomia, agrikultura , sosiál, seguransa aihan, no mudansa klimátika.

Prezidente Ezekutivu INCT, José Cornelio Guterres, hateten INCT seidauk iha peskizadór rasik tanba ne’e, ba tinan oin sei husu apoiu husi dosente universidade privada no públiku iha Timor-Leste atu apoiu implementa programa peskiza ne’e.

“Ita-nia programa prioridade ba 2021 nian mak atu halo peskiza ba área lima ne’ebé ita identifika ona maka ekonomia, agrikultura, sosiál kona-ba jéneru no foinsa’e sira, seguransa aihan, mudansa klimátika inklui área sira ne’ebé mak koresponde ba planu estratéjiku nasionál no  objetivu dezenvolvimentu sustentavel  nasaun unidu nian,” nia dehan ba Tatoli iha salaun Ministériu Ensinu Superiór Siénsia no Kultura (MESSK) Colmera Dili, kinta ne’e.

Daudaun ne’e INCT komesa identifika ona dosente sira ne’ebé atu sai peskizadór ba programa ne’e maibé kandidatu sira persiza hatama aplikasaun nune’e INCT bele halo selesaun para garante servisu ne’e la’o ho di’ak no susesu.

“Ita presiza hetan dosente ne’ebé kualifikadu tanba ne’e ita sei halo uluk formasaun ba dosente sira ne’ebé ninia proposta tama kategoria hodi nune’e sira bele hatene didi’ak materia peskiza ne’ebé sira atu halo atu nune’e rezultadu ikus mós bele konvense duni públiku,” nia hateten.

Programa peskiza ne’e sei hala’o iha inísiu janeiru 2021 ho orsamentu purvolta $500.000-resin.

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here