Ministru Justisa, Manuel Cárceres da Costa. Imajen Tatoli/Egas Cristovão.

DILI, 04 novembru 2020 (TATOLI)–Ministru Justisa, Manuel Cárceres da Costa, kondena maka’as kazu asasinatu iha Raikotu no promete sei ko’alia ho parte kompetente hodi haree didi’ak kazu ne’e.

“Ha’u kondena hahalok ne’e no labele akontese tan iha ita-nia rain, hanesan Ministru  Justisa ha’u mós tau-matan hela tanba ha’u iha kbiit ida liuhosi konsellu koordenasaun ba  justisa, bele ko’alia ho Prokuradór Jerál Repúblika no Prezidente Tribunál Rekursu atu haree kazu sira ne’e,” Ministru Justisa, Cárceres  iha Palásiu Governu kuarta ne’e.

Kazu ne’e envolve kondenadu LH hasoru vítima, Domingas Soares ne’ebé mate iha fatin no ninia oan (LM) ne’ebé hetan kanek iha liman, akontese iha aldeia Terra Santa, Raikotu, Dili, sesta (30/10) pur volta 01:10 madrugada.

Tuir Ministru, prosesu justisa la’o hela tanba ne’e MJ daudaun sei akompaña prosesu no seidauk bele halo buat ida.

“Prosesu la’o hela, tama ona ba kompeténsia Ministériu Públiku no Tribunál, Ministru labele tau kanuru tohar no ita hotu reza atu justisa ne’e di’ak. Husik ema halo lai serbisu maka ita haree. Maibé ha’u fiar nia  (kondenadu) sei hetan kastigu todan,” nia subliña.

Daudaun kondenadu iha ona prizaun preventiva, tanba ne’e Governu kontinua ajuda prosesu hodi bele la’o ho di’ak.

“Ita hotu presiza buka informasaun no halibur, liuliu fó protesaun ba ita-nia alin oan atu nune’e  evidénsia labele lakon,” nia akresenta.

Kronolojia krime ne’e, LH halo tentativa violasaun sexuál hasoru vítima LM no iha tempu hanesan vítima hakilar husu tulun hafoin kondenadu lori tudik sona joven feto to’o sofre kanek maka’as iha parte liman no kaba’as.

Aleinde ne’e, tanba tauk LH halai no hasoru kedan Domingos Soares no LH lori tudik sona iha vítima ninia hirus-matan to’o mate iha fatin.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here