Vise-Ministra Finansa, Sara Lobo Brites. Imajen TATOLI/Egas Cristovão

DILI, 04 novembru 2020 (TATOLI)—VIII Governu Konstitusionál prevee millaun $123.9 ba pakote rekuperasaun ekonómika iha proposta-lei Orsamentu Jerál Estadu (OJE) 2021.

Notísia Relevante: Prezidente Repúblika promulga dekretu-lei apoiu planu rekuperasaun ekonómika

“Komponente importante iha orsamentu 2021 mak planu (pakote) rekuperasaun ekonómika ho objetivu hasa’e empregu, bele investe nafatin iha kapitál sosiál no mós promove nafatin setór produtivu sira hodi bele kontribui ba kresimentu ekonómika,”  Vise-Ministra Finansa, Sara Lobo Brites, esplika liuhosi semináriu panorama orsamentál ne’ebé organiza hosi Parlamentu Nasionál no PFMO, iha Hotel Novo Turizmu, segunda ne’e.

Iha loron 12 agustu liubá, Governu aprova pakote rekuperasaun ekonómika ho objetivu atu rekupera ekonómia hosi impaktu COVID‐19 ba períodu 2021‐2023.

Bazea ba livru 1 (Panorama orsamentál) prevee pakote rekuperasaun ekonómika iha objetivu tolu mak hanesan hasa’e empregu: asegura katak empregus hotu produtivu no dignifikadu, realizasaun no konsolidasaun ba programa investimentu sosiál (edukasaun, saúde, abitasaun no protesaun sosial).

Objetivu ikus liuhosi pakote rekuperasaun ekonomika ne’e prioritiza setór produtivu no promove área ne’ebé bele kontribui ba kresimentu ekonómiku.

Orsamentu ba pakote rekuperasaun ekonómika hamutuk millaun $123.9 no orsamentu ida-ne’e inklui ona atividade balun ne’ebé la’o hela no mós ba medida rekuperasaun ekonómika seluk hosi instituisaun estadu sira.

Ministériu Finansa mós halo ona mapeamentu ba ajudu hosi parseiru dezenvolvimentu sira, ne’ebé aprezenta ho detalla iha livru orsamentu númeru 5 ba OJE 2021.

Iha implementasaun Pakote Rekoperasaun  Ekonómika ba tinan 2021 koloka mós administrasaun munisipál sira kompostu hosi Administrasaun Munisípiu Aileu rihun $396,836, Administrasaun Munisípiu Ainaro rihun $441,029, Administrasaun Munisípiu Covalima rihun $442,008.

Nune’e mós Administrasaun Munisípiu Lautém rihun $430,907, Administrasaun Munisípiu Liquiçá rihun $450,288, Administrasaun Munisípiu Manatuto rihun $382,691, Administrasaun Munisípiu Manufahi rihun $404,586, Administrasaun Munisípiu Viqueque rihun $501,466, Autoridade Munisipál Baucau rihun $654,847, Administrasaun Munisípiu Bobonaro rihun $548,625, Autoridade Munisipál Dili rihun $652,458 no Autoridade Munisipál Ermera rihun $694,259.

Entretantu hosi pakote rekuperasaun ekonómika ne’e Sentru Nasionál ba Empregu no Formasaun Professional rihun $41,000, Komisaun Funsaun Públika rihun $17,200, Hospital Nasional Guido Valadares millaun $1,739,000, Institutu Nasionál Saúde rihun $235,290, Ministériu Administrasaun Estatal hetan millaun $31,416,640, Ministériu Agrikultura no Peska  millaun $5,177,675.

Nune’e mós Ministériu Edukasaun, Juventude no Desportu millaun $31,711,000, Ministériu Justisa millaun $2,067,000, Ministériu Saúde millaun $12,651,000, Ministériu Obra Públika millaun $21,503,286, Ministériu Turismu, Komérsiu no Indústria millaun $2,185,000, Ministériu Transporte no Komunikasaun millaun $3,042,000, MECAE rihun $340,000,  SEPFOPE millaun $1,354,000, Sekretariu Estadu Kooperativa millaun $3,500,000, Sekretariu Estadu Ambiente rihun $540,000 no SERVE  rihun $438,000.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here