Komunidade sira iha Semiteriu santa cruz komemora loron matebian.Imajen Tatoli/Hortencio

DILI, 02 novembru 2020 (TATOLI)—Amu selebrante misa finadu iha Semitériu Santa Cruz Dili, Pe.Angelo Salsinha, hateten família matebian sira-nia orasaun importante atu tulun klamar sira iha purgatóriu hodi hetan salvasaun.

“Ho ita-nia orasaun, ho ita-nia sakrifisiu, ita-nia peniténsia, ita-nia ismola nu’udar atetude konkretu hosi ai-funan no lilin ita oferese atu sira bele hetan fatin kmanek. Ita sira ne’e mós atu konfia liután ba Maromak ho laran mós neon mós atu bele hetan moris di’ak iha lalehan,” nia dehan.

Orasaun sai save importante atu tulun matebian sira-nia klamar iha purgatóriu nune’e bele moris hamutuk ho Anjo sira iha Lalehan.

“Iha loron matebian ida ne’e ita agradese ba Nai Maromak tanba uluk liuhosi Igreja peregrinu mak ita hotu agora sei rai hela. Igreja purgante mak sira ne’ebé agora iha purgatóriu hela karik iha ne’ebé sira-nia moris la komprinde Maromak iha sira-nia plenitude, nune’e ohin ita selebra atu husu tulun ba sira,” tenik Padre Angelo bainhira prezide misa no fó bensaun ba ai-funan iha Santa Cruz Dili.

Entertantu, selebrasaun misa iha Santa Cruz Dili hala’o iha tuku 09:00 Otl; maibé sarani balun hahú kari ai-funan iha tuku 08:00 Otl.

Jornalista: Hortencio Sanchez

Editór: Agapito dos Santos

HAKEREK NO HATÁN

Please enter your comment!
Please enter your name here