Vítima Domingas Soares, ne’ebé salva ninia oan-feto hosi tentativa violasaun sexuál iha Raikotu, foin lalais ne'e. Imajen/Espesiál

DILI, 01 novembru 2020 (TATOLI)—Prezidente Komisaun Polítika Nasionál (CPN-sigla portugés) hosi Partidu Congresso Nacional da Reconstruçao de Timorense (CNRT), Dionísio Babo Soares, kondena makaas aktu krime ne’ebé akontese iha área Tasi Tolu, Raikotu, Dili.

“CNRT kondena maka’as aktu ne’ebé akontese no husu PNTL atu halo investigasaun profunda no buka hatene kauza hosi kazu hirak ne’e. CNRT lamenta tebes tanba númeru violénsia no krime seksuál aumenta iha tinan rua ikus ne’e,” Prezidente CPN-CNRT informa liuhosi komunikadu imprensa ne’ebé Agência TATOLI asesu, sábadu ne’e.

Eis Ministru Justisa ne’e akresenta, observasaun hosi sosiedade sivíl durante ne’e fó-sai beibeik ona kona-ba númeru kazu ne’e no mós esforsu hosi Igreja ba edukasaun makaas maibé esforsu  hirak ne’e seidauk hetan apoiu másimu iha eskola sira liuliu eskola públika sira.

Tanba ne’e CNRT apela atu Ministériu Edukasaun bele masimiza apoiu ba edukasaun morál no relijiaun iha eskola liuliu eskola primária ho seundária hanesan uluk.

“Presiza mós atu suku sira komesa halo esforsu hodi reforsa servisu seguransa suku nian atu aumenta edukasaun morál liuliu ba adolesente ho joven sira no prevene akontesimentu sira nune’e mosu iha futuru,” Eis Ministru Negósiu Estranjeiru no Kooperasaun ne’e fó hanoin.

Hafoin akontesimentu ne’e, Prezidente Partidu CNRT Kay Rala Xanana Gusmão vizita uma matebian hodi hato’o sentida kondolénsia ba família enlutada.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here