Ekipa konjunta halo inspesaun ba veíkulu Estadu, iha edifisiu MF, sábadu (31/10). Imajen TATOLI/Nelia Fernandes

DILI, 31 outubru 2020 (TATOLI)–Ekipa konjunta kompostu husi Ministériu Administrasaun Estatál (MAE) no Ministériu Finansa (MF), Komisaun Antí Korrupsaun (CAC, sigla potugés), Diresaun Nasionál Patrimóniu Estadu (DNPE), Polísia Nasionál Timor-Leste (PNTL) Seksaun Tránzitu inklui Komisaun Funsaun Públika (CFP, sigla portugés) halo inspesaun ba veíkulu Estadu iha ministériu hotu iha ámbitu loron finadu.

Tuir Pontu Vokál PNTL ba ekipa konjunta fiskalizasaun bem e moveis Governu, Inocêncio da Costa M. Freitas, atividade ne’e hahú desde horiseik no ko kontinua ohin.

”Ekipa konjunta halo revista ba ministériu hotu atu haree implementasaun avizu ne’ebé fó sai hosi leten mai katak durante loron finadu hahú loron 31 to’o 02 outubru, kareta Estadu hotu tenke para iha idaidak ninia instalasaun, tantu husi departamentu ou ministériu idaidak,” Pontu Vokál informa iha edifísiu MF, sábadu ne’e.

Iha inspesaun ne’e, ekipa nota katak kareta barak maka para iha fatin, tanba ne’e ekipa konsidera ministériu sira tuir duni orientasaun Governu.

”Ministru sira-nia kareta mós para hotu, ita haree husi leten mak kumpre ona orientasaun. Tanba ne’e iha kraik hakarak ka lakohi tenke kumpre tuir buat sira ne’ebé hatun ona,” nia akresenta.

Nia refere tuir dekretu Governu, kareta Estadu uza loron lima de’it iha semana ida nia laran maibé bainhira uza liu loron konsidera la kumpre regra, sei hetan sansaun no submete ba investigasaun hosi parte kompetente.

“Bainhira uza sala kareta no la tuir prosedimentu ne’ebé iha tuir lei hateten maka sei hetan sansaun. Sansaun depende filafali ba investigasan, maibé ida-ne’e kompeténsia Komisaun Funsaun Públika,” nia fó hanoin.

Iha fatin hanesan, Diretór Nasionál Lojístika, Manutensaun no Jestaun Projetu Espesiál iha MF, Domingos Marques, hateten iha inspesaun ne’e identifika iha kareta balun antes sirkulár fó sai, funsiónariu ida husu lisensa no na’in-rua maka la para iha fatin instalasaun.

”Ami halo tuir sirkulár husi ekipa konjunta no ami implementa tuir lei númeru 8/2003 ne’ebé vigora tiha ona, hateten katak kareta loron sesta tenke para iha edifísiu, maibé to’o agora foin atu reforsa ba implementa lei ne’ebé vigora ona,” nia informa.

Tuir Diretór ne’e, kareta husi parte MF para hotu iha fatin, hahú husi Ministru to’o kareta operasiónal sira.

Jornalista: Nelia Fernandes

Editora: Julia Chatarina

HAKEREK NO HATÁN

Please enter your comment!
Please enter your name here