speitu ho inisiál LH, tinan 38, Imajen/foti hosi Facebook

DILI, 30 outubru 2020 (TATOLI)- Domingas Soares, nu’udar inan ba nia oan-feto estimadu  ho inisiál LM, tinan 12, tenke lakon nia vida no saran-an ba mate hodi soi nia oan-feto hosi atentadu violasaun seksuál hosi aktu suspeitu LH.

Kazu omosídiu agravadu no tentativa violasaun seksuál  ne’e akontese iha vítima, Domingas Soares nia rezidénsia iha Raikotu-Tera Santa, Dili, sesta (30/10), purvolta tuku 1:10 madrugada.

Vitima LM ne’ebé suspeitu halo tentativa violasuan seksuál. Imajen/Foti hosi Facebook

Tuir kronolojia ne’ebé PNTL rekolla katak, iha kalan ne’e matebian ho nia-oan feto sira toba iha idak-idak nia kuartu-laran, derrepente suspeitu LH hakat tama sira-nia uma-laran hodi liu kedas ba vítima LM nia kuartu-laran hodi tenta halo violasaun seksuál, maibé tanba vítima LM hakilar, no suspeitu ho ta’uk lori tudik sona mós LM nia liman karuk rezulta kanek maka’as no suspeitu tenta halai sai hosi uma-laran hasoru kedas vítima Domingas, iha odamatan oin, no suspeitu lori tudik sona kedas vítima nia hirus-matan to’o mate fatin.

“Suspeitu ho inisiál LH, tinan 38, tama ba vítima nia uma hodi sona vítima na’in-rua, inan ho oan feto no rezulta inan-mate kedas iha fatin, no oan feto kanek todan hodi evakua kedas ospitál,” Komandante PNTL Munisípiu Dili, Superintendente Xefe, Henrique da Costa, haktuir ba jornalista liuhosi konferénsia imprensa, ohin, iha Komandu PNTL, Dili.

Superintendente Xefe Henrique hatutan, hafoin akontesimentu, PNTL hamutuk ho autoridade sira  to’o fatin salva vítima nia oan-feto LM hodi hala’o tratamentu iha Sentru Saúde Comoro no matebian lori kedas ba Ospitál Nasionál Guido Valadares  (HNGV) hodi hala’o autópsia.

Hafoin halo investigasaun, PNTL hamutuk ho autoridade no komunidade sira mós buka tuir paradeiru suspeitu LH nian hodi halo kapturasaun no detein iha sela Polísia Munisípiu Dili durante oras 72.

“Ita nia polisia Don Aleixo buka tuir hetan suspeitu LH hodi kaptura kedas, agora iha sela polísia hodi kontinua ba prosesu investigasaun,” Komandante Henrique hateten.

Komandante Henrique mós klarifika informasaun ne’ebé sirkula iha media sosiál Facebook katak, suspeitu nu’udar membru PNTL ne’e laloos, maibé suspeitu nia kaben mak nu’udar membru PNTL ida.

Kazu ne’e halo populasaun sira ne’ebé hela besik vítima nia uma sente trauma, tanba suspeitu halo asaun oho vítima ho razaun ne’ebé la klaru.

Iha fatin akontesimentu, PNTL rekolla mós sasán evidénsia, hanesan tudik kro’at ida ne’ebé suspeitu lori hodi sona mate vítima.

Matebian Domingas Soares hosi Munisípiu Bobonaro durante ne’e hela hamutuk ho nia oan-feto LM no sira uma viziñu mós ho suspeitu.

Daudaun ne’e iha matebian nia uma, família sira halo ona preparasaun hodi hala’o serimónia funerál.

 Jornalista  : Eugénio Pereira

Editór        : Francisco Simões

 

1 KOMENTÁRIU

HAKEREK NO HATÁN

Please enter your comment!
Please enter your name here