Komandante PNTL Munisípiu Aileu, Superintendente Polísia, Jorge Monteiro. Imajen TATOLI/Osória Marques.

AILEU, 30 outubru 2020 (TATOLI)–Komandante PNTL Munisípiu Aileu, Superintendente Polísia, Jorge Monteiro, hateten Komandu Polísia Nasionál Timor Leste (PNTL) Munisípiu Aileu sei la autoriza ka bandu sidadaun konsumu alkol iha semitériu liuliu iha loron matebian sira-nian ne’ebé kada tinan monu iha loron 02 novembru ne’e. 

“Ita sei la autoriza ema atu konsumu alkol iha semitériu. Bele hemu maibé iha fatin própriu ka ida-idak nia uma labele konsumu fali iha fatin sira hanesan merkadu, semitériu, estrada ka dalan públiku, hodi labele hamosu konflitu iha loron matebian,” Komandante PNTL Munisípiu Aileu, Superintendente Polísia, Jorge Monteiro ba jornalista sira iha nia knaar fatin PNTL Aileu, foin lalais ne’e.

Selebrasaun loron matebian, nia dehan, selebra ho di’ak no evita  konsumu alkol liu fali kapasidade fíziku individu nian. La’ós PNTL bandu maibé tuir ida-idak nia kapasidade fíziku tuir kuantidade ne’ebé mak iha.

Komandante ne’e haktuir, selebrasaun loron matebian sira-nian hanesan kulturál, tradisionál no kostume ida hodi ema sempre lori ai-funan, lilin no hahan, maibé bandu  alkol ba iha semitériu, klaru PNTL bandu alkol tanba semitériu ne’e konsidera hanesan fatin públiku.

“Klaru ita-nia kultura Timor nian ne’e lori hahan ba semitériu iha loron matebian maibé PNTL hakarak evita de’it konsumu alkol,” nia hateten. 

Relasiona ho loron matebian, komandante PNTL ne’e hateten, PNTL Munisípiu Aileu simu ona diretiva hosi komandu PNTL hamutuk 144.

“Ami simu ona diretiva hosi komandu PNTL hamutuk 144 maibé sei distribui ba munisípiu hotu-hotu la’ós ba Aileu de’it,” nia dehan.

Oinsá asegura situasaun seguransa iha Aileu, nia hatán PNTL Aileu komesa dezeña ona planu operasaun hahú ohin tanba kapitál Dili ba munisípiu sira seluk fila loron 04 novembru no dala ruma loron 05 novembru entaun PNTL Aileu deside ramata to’o loron 05 novembru.

“Tanba ita hotu hatene, Aileu mak rai-klaran nune’e dala barak ita-nia populasaun hosi Dili ba Suai, Same depois Natarbora hotu-hotu liuhosi Aileu nian. Tanba ne’e, ami polísia Aileu hakarak asegura seguransa to’o loron 05 novembru,” Superintendente Polísia, Jorge Monteiro hateten.

Atu asegura seguransa iha Munisípiu Aileu, komandante ne’e haktuir atividade seguransa sei fahe ba ekipa rua (2) mak ekipa dahuluk halo servisu operasaun durante oras 24 nia-laran hafoin ekipa daruak troka fali ho oras ne’ebé mak hanesan to’o 05 novembru.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here