Sekretária Meza Parlamentu Nasionál, Deputada Lídia Norberta dos Santos Martins no Vise-Sekretária Meza Parlamentu Nasionál, Deputada Regina Freitas, hala'o konferénsia imprensa hodi fó-sai atividade parlamentár nian kada semana. Imajen TATOLI/Evaristo Soares Martins.

DILI, 30 outubru 2020 (TATOLI)—Grupu Feto Parlamentár Timor-Leste (GMPTL-sigla portugés) sei halo doasaun-raan hodi selebra Loron Nasionál Feto Timor-Leste ne’ebé monu iha 03 novembru 2020.

Loron Nasionál Feto ne’e monu iha 03 novembru maibé GMPTL liderada Deputada Lídia Norberta dos Santos Martins, deside selebra iha loron 6 novembru 2020.

Komemorasaun Loron Nasionál Feto Timor-Leste dala-45 ne’e ho tema “Promove Partisipasaun Feto iha Nível Foti Desizaun  hodi Lidera ba Mudansa no Inkluziva.”

“Ita sei selebra halo doasaun-raan hodi selebra loron nasionál feto ne’e tanba durante ne’e ita haree iha Timor, liuliu Hospital Nacional Guido Valadares (HNGV) kuran tebes raan ba pasiente sira. Entaun, ho komemorasaun ida-ne’e halo doasaun-raan hodi kontribui raan turuk ida hodi salva ema barak nia vida,”  Prezidente GMPTL, Deputada Lídia Norberta dos Santos Martins, informa liuhosi konferénsia imprensa, iha sala konferénsia Parlamentu Nasionál, sesta ne’e.

Deputada Bankada FRETILIN ne’e fó-sai katak, iha loron selebrasaun loron nasionál feto ne’e sei halo atividade feira balun iha resintu Parlamentu Nasionál.

Líder feto parlamentár ne’e mós hato’o felisitasaun feto Timoroan hotu-hotu hodi fó liman ba malu selebra loron feto ne’e.

“Ita feto Timor hasoru dezafiu oioin. Ha’u ko’alia hanesan ne’e la’ós feto maluk sira iha kraik mak hasoru dezafiu maibé iha leten mós hasoru dezafiu maibé ita tenke aten barani nafatin. Ho komemorasaun ne’e hatudu ita-nia aten barani hodi defende nafatin feto maluk sira-nia direitu no feto maluk sira-nia papél no devér tenke haree hotu,” nia dehan.

Prezidente Grupu Feto Parlamentár ne’e subliña, feto 38% mak envolve iha desizaun polítika sira ne’ebé ekivalente ba deputada na’in-25 iha Parlamentu Nasionál.

Entretantu parte Governu nian liuhosi Sekretaria Estadu ba Igualdade no Inkluzaun (SEII) liderada Maria José da Fonseca Monteiro de Jesus, sei komemora loron nasionál feto ne’e iha Suku Luro, Postu Administrativu Luro, Munisípiu Lautem.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here