Treinadór Ponta Leste, Eduardo Pereira. Imajen/Espesiál

DILI, 29 outubru 2020 (TATOLI) – Treinadór prinsipál AS Ponta Leste, Eduardo Pereira hateten, klube  AS Ponta Leste kontinua mantein jogadór hirak ne’ebé foin lalais joga iha kopa Federasaun Futeból Timor – Leste (FFTL) no laiha mudansa ba jogadór sira.

“Ponta Leste mantein nafatin ho ekipa ida ne’ebé foin lalais partisipa iha kopa FFTL. Laiha mudansa ba jogadór,” hateten Eduardo Pereira ba Agência Tatoli, ohin, iha kampu FFTL, Dili.

Nia dehan, Ponta Leste prontu no preparadu hodi partisipa iha Tasa 12 de Novembru. Maibé, desizaun hotu sei hein hosi jestór  klube nian.

“Hanesan treinadór ha’u prepara jogadór sira ho di’ak, ami prontu partisipa, maibé sei haree lai hosi jestór klube nian, fó sai loloos ona katak partisipa, entaun ami sei partisipa,” nia hateten.

Tuir informasaun ne’ebé nia rona katak jogu ba Tasa 12 de Novembru laiha subsídiu ba jogadór sira. “Ha’u rona dehan jogu Tasa 12 ne’e laiha subsídiu. Se laiha ida ne’e susar uitoan ba jogadór sira tanba sira mai ho kondisaun ne’ebé la hanesan, balu hela ba eskola no seluk tan, se subsídiu laiha oinsá bele fasilita jogadór sira. Maibé jestór  klube reuniaun ona ho Liga Futeból Timor – Leste pois mak ami rona rezultadu oinsá,” nia hateten.

Informasaun ne’ebé fó sai ona hosi órgaun LFTL katak, jogu tasa 12 de Novembru hanesan jogu obrigatóriu. Tanba ne’e hakarak ka lakohi klube sira tenke partisipa, tanba bainhira  la partisipa maka sei hetan sansaun.

Jornalista   : Hortencio Sanchez

Editór        : Francisco Simões

 

HAKEREK NO HATÁN

Please enter your comment!
Please enter your name here