Estudante eskola filiál Komandante Maubuti foto hamutuk ho Komandante kompañia Delta, Komponente Terrestre, FALINTIL-Forsa Defeza Timor Leste (F-FDTL) Baucau, Tenente Baldino Julião António Martins. Imajen/Espesiál

DILI, 28 outubru 2020 (TATOLI)–Komandante kompañia Delta, Komponente Terrestre, FALINTIL-Forsa Defeza Timor Leste (F-FDTL) Baucau, Tenente Baldino Julião António Martins, harii eskola filiál  Komandante Maubuti, tanba antes ne’e iha esperiénsia hanorin iha eskola.

Tenente Baldino konta tuir ninia inisiativa harii eskola ne’e katak, antes ne’e assume kargu hanesan instrutór hodi hanorin forsa foun sira no mós oinsá tau matan ba programa rekrutamentu forsa foun, hahú hosi 2010 to’o 2015.

Estudante eskola filiál Komandante Maubuti foto hamutuk ho Komandante kompañia Delta, Komponente Terrestre, FALINTIL-Forsa Defeza Timor Leste (F-FDTL) Baucau, Tenente Baldino Julião António Martins. Imajen/Espesiál

Iha outubru 2015, komandu jerál F-FDTL transfere Tenente Baldino ba Komponente Terrestre Baucau, no assume kargu hanesan segundu komandante kompañia Alfa.

“Iha Komponente Terrestre ne’e iha kompañia lima mak hanesan, kompañia Alfa, Bravo, Charli, Delta ho tan Apoiu Serbisu, no oras ne’e daudaun ha’u hanesan komandante ba kompañia Delta,” Tenente Baldino haktuir lia hirak ne’e ba jornalista iha edifísiu agência Tatoli, tersa ne’e.

Iha Baucau, hanesan ofisiál Baldino hetan priviléjiu dalaruma bele ba toba iha uma, nune’e kuandu dadersán ba serbisu, nia sempre haree maluk militár nia oan sira ne’ebé hela iha  uma militár 200 ba família militár sira, abandonadu no la ba eskola.

“Ha’u husu sira tanba saida mak imi la ba eskola. Sira balun hatán dehan tiu eskola dook. Entaun, ha’u husu fali maluk militár sira nia kaben, tanba saida mak imi husik de’it labarik sira no la lori sira ba eskola. Balun hatán dehan, labarik nia aman kumpre hela misaun iha fronteira laiha ema atu lori ba eskola. Hosi-ne’e mak mosu iha hanoin katak, ita serbisu no kuidadu nasaun ida-ne’e atu hakmatek no ita-dook hosi ita-nia família, agora ita nia oan abandonadu,” nia  hateten.

Hosi uma 200 ne’ebé Ministériu Defeza harii ba militár nia família atu hela, antes ne’e iha ona aula mamuk rua ne’ebé tuir loloos prepara atu loke eskola ba militár nia oan sira, maibé la uza tanba fasilidade laiha, profesór mós laiha, inklui ema atu jere eskola ne’e laiha.

“Ho situasaun ne’e mak ha’u brani ba hasoru komandante Maubuti nu’udár komandante komponente Terrestre Baucau, hodi aprezenta no esplika hela situasaun ne’e. Komandante Maubuti mós fó konfiansa ba ha’u hodi buka dalan oinsá harii eskola ba militár nia oan sira iha fatin ne’e,” nia tenik.

Iha prosesu ne’e, Tenente Baldino halo uluk proposta ne’ebé asina hosi komandante Maubuti, haruka  ba Ministériu Edukasaun, Munisípiu Baucau, no konsege aprova hodi manda kedan ba Ministériu Edukasaun altura ne’ebá Ministra Dulce de Jesus maka aprova.

Hafoin hetan aprovasaun, Ministériu Edukasaun oferese kedan profesór kontratadu na’in-rua, no hahú estabelese eskola infantíl klase A no B iha tinan 2016 ho alunu na’in-50 resin ne’ebé halo graduasaun dahuluk iha 2017.

“Ha’u nia esperiénsia antes tama militár ne’e hanesan mós mestre (manorin), hanorin iha eskola, tanba ne’e mak ha’u mós iha hanoin atu tulun no ajuda hodi halo jestaun ba eskola ne’e, maski agora hanesan koordenadór no konselleiru tanba hanesan militár labele assume kargu seluk tan,” nia informa.

Nia mós konta tuir katak, família militár sira ne’ebé hela iha uma 200 ne’e, kada fulan kontribui $5 ba osan hodi halo reabilitasaun uma nian, nune’e Tenente Baldino halo pedidu ba komandante hodi husu osan uitoan, atu bele hola sasán halimar ba labarik sira, no iha tinan rua liubá, governu liuhosi Programa Nasionál Dezenvolvimentu Suku (PNDS) konsege konstrui tan halimar fatin, kadeira-meza mós laiha problema, maibé bee-moos mak laiha.

Oras ne’e daudaun iha ona manorin kontratadu na’in-lima, tanba iha ona eskola báziku ne’ebé kompostu  ousi primeiru to’o terseiru anu ho estudante na’in-100 resin, inklui komunidade nia oan sira ne’ebé hela besik iha área ne’e ho nia diretór maka Hélio Ximenes da Costa.

Tenente ne’e mós halo ona pedidu ba Ministériu Edukasaun atu husu tulun hodi harii tan aula tolu, nune’e kompleta eskola báziku to’o sestu anu.

“Ha’u nia mehi hakarak atu eskola ne’e tenke to’o sekundáriu tanba ha’u hakarak liuhosi ha’u nia esforsu ne’e hakarak atu hetan lider ne’ebé di’ak hosi eskola ne’e iha futuru,” nia hateten.

Tenente Baldino mós hakarak dignifika veteranu sira, tanba ne’e mak eskola ne’e nia naran tau eskola Komandante Maubuti nu’udár veteranu ida ne’ebé fó mós kontribuisaun ba rai ida ne’e ninia ukun rasik aan.

Baldino konklui ninia estudu iha Eskola Sekundária Katólika Santo António Baucau, iha tinan 2000, no 2001 kontinua ba Institutu Superiór Kristál, departamentu Kímika no gradua iha 2005.

Nia mós tuir formasaun iha World Vision International, no sai hanesan treinadór ba harii paz no protesaun labarik.  Iha 2008 hanorin iha Eskola Sekundária Katólika Santo António Baucau to’o 2009 mak kompete ba forsa.

Durante iha instituisaun F-FDTL Tenente Baldino tuir formasaun oioin kona-ba direitu umanu, formasaun kona-ba rekrutamentu forsa foun sira, treinamentu kona-ba ofisiál ligasaun ONU no iha 2018 tuir formasaun iha Estadus Unidus Amérika, haree liubá rekrutamentu ba forsa, oinsá fó treinu, investe to’o sira reforma.

Jornalista   : Cipriano Colo

Editór        : Francisco Simões

 

HAKEREK NO HATÁN

Please enter your comment!
Please enter your name here