Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (28/10). Imajen Tatoli/Egas Cristovão

DILI, 28 outubru 2020 (TATOLI)—Governu liuhosi sorumutuk Konsellu Ministru (KM) aprova projetu dekretu Governu, ne’ebé aprezenta hosi Primeiru-Ministru, Taur Matan Ruak, kona-ba medida ezekusaun Estadu Emerjénsia (EE), ne’ebé renova tuir dekretu Prezidente Repúblika númeru 66/2020, loron 27 outubru hodi hatán ba pandemia COVID-19.

Ministru Prezidénsia Konsellu Ministru, Fidelis Manuel Leite Magalhães, relata Estadu EE dahitu sei abranje iha territóriu nasionál tomak no vigora iha tuku 00:00 loron 04 novembru to’o tuku 23:59 loron 03 dezembru 2020.

“Iha obrigasaun  atu mantein distánsia pelu menus metru ida-resin ba ema seluk maibé la inklui distánsia sosiál iha família sira iha uma laran, utiliza  máskara oin ne’ebé taka inus no ibun bainhira iha asesu ka mosu iha resintu públiku no privadu,” Ministru Fidelis relata hafoin ramata reuniaun KM iha Palásiu Governu, kuarta ne’e.

Nune’e mós, mantein fase liman bainhira hakarak tama ba estabelesimentu komersiál, industriál ka edifísiu ne’ebé funsiona servisu administrasaun públika.

Relasiona ho dekretu Governu númeru 13/2020, loron 03 outubru, ne’ebé define medida ezekusaun EE, rejista alterasaun regra izolamentu profilátiku obrigatóriu ne’ebé aplika ba traballadór setór petrolíferu no membru tripulasaun aérea ne’ebé asegura transporte internasionál ba pasajeiru sira no motorista veíkulu boot ne’ebé transporta merkadoria liuhosi fronteira terrestre, hahú  hetan aprovasaun  tuir diploma ministeriál Ministériu Saúde.

Medida ezekusaun ba deklarasaun EE seluk, refere ba mantein obrigatóriu ba ema ne’ebé tama no sai hosi territóriu nasionál, tenke sujeita ba kontrolu sanitáriu no izolamentu profilátiku (kuarentena) ho durasaun mínimu loron 14 no halo teste ba COVID-19 inklui sidadaun sira ne’ebé hatudu sintoma COVID-19 ka iha kontaktu ho individu ne’ebé infetadu ho SARS-CoV2.

Enkuantu despeza ne’ebé relasiona ho izolamentu profilátiku sei suporta hosi individuu ida-idak bainhira kumpre estabelesimentu saúde, hela-fatin no sentru izolamentu privadu. 

Kontinua bandu pasajen fronteira terrestre ba fins tradisionál ka kostumeiru sira, ne’ebé asesu ba merkadu.

Estranjeiru ne’ebé tama iha territóriu nasionál, liuhosi fronteira terrestre tenke husu autorizasaun uluk durante períodu vijénsia EE, lisensa, no autorizasaun, atu administrativu no dokumentu sira hotu válidu nafatin, la haree ba durasaun prazu validade.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here