Primeiru-Ministru, Taur Matan Ruak, hamutuk ho membru Governu diskute pedidu renovasaun deklarasaun EE hosi Prezidente Repúblika, iha Sala plenáriu , tersa (27/10). Imajen Tatoli/Egas Cristovão

DILI, 27 outubru 2020 (TATOLI)--Primeiru Ministru, Taur Matan Ruak, rejeita deklarasaun Bankada Congresso Nacional para a Reconstrução de Timor-Leste (CNRT), ne’ebé konsidera kazu konfirmadu COVID-19 fabrika husi VIII Governu Konstitusionál tanba sempre mosu molok estensaun Estadu Emerjénsia (EE) ramata.

“Dalaruma Maromak mak halo ou dala ruma sinál ba ita. Tanba se ita la hanoin hanesan ne’e, ita bele deskonfia fali ita-nia tékniku profisionál sira mak fabrika ka inventa hanoin ne’e risku ba ita,” Xefe Governu afirma kestaun ne’e hodi responde preokupasaun Xefe Bankada CNRT iha plenáriu Parlamentu Nasionál (PN), tersa ne’e

PM Taur konsidera sinál ne’e di’ak tebes tanba bele alerta ba Governu no sidadaun sira atu kontinua nafatin medida sira hodi reforsa prevensaun surtu COVID-19.

Daudaun diskute ona ho Prezidente Repúblika no Prezidente Parlamentu Nasionál  atubele prodúz lei ruma ba prevensaun COVID-19 sein EE.

“Momentu ida-ne’e Parlamentu Nasionál mak bele prodúz lei, maibé ho orsamentu rua ne’ebé submete ona ami bele ezije, maibé ha’u fiar katak iha tempu oin mai no serbisu menus naturalmente Parlamentu Nasionál bele rezolve preokupasaun deputadu no sidadaun sira  bainhira mak Estadu Emerjénsia bele hotu,” nia akresenta.

Xefe Governu hatutan, karik la aplika ona EE bainhira COVID-19 hotu ou Governu iha alternativa kona-ba seguransa jurídika ba medida sira.

PM nota katak durante ne’e sidadaun kompresiva tebes tanba aseita medida sira, nune’e Governu bele jere ho prudente atu labele afeta ba sidadaun nia moris loron-loron no movimentu maibé alerta nafatin atu kontinua kuidadu saúde tanba iha terrenu iha moras tuberkoleze, má-nutrisaun no tensaun ne’ebé kuandu COVID-19 afeta mai bele iha risku boot.

“Forma di’ak  atu impede surtu ne’e labele alastra iha komunidade nia leet mak Estadu Emerjénsiania subliña.

Xefe Bankada CNRT, Deputadu Duarte Nunes, hateten durante ne’e sempre akompaña situasaun iha estensaun EE sempre mosu kazu COVID-19.

“Atu koinsidénsia ka planeadu, ba ami bele konsidera hanesan situasaun ida-ne’ebé ita bele dehan fabrikadu, tanba ita iha laran bele hatene realidade maibé ema kuandu rona to’o nasaun viziña sira dezafia atu kontrata ita-nia doutór sira ne’ebé loron haat kura moras ne’ebé mosu,” tenik Deputadu bankada opozisaun ne’e.

Nia dehan, situasaun ne’e bele realidade maibé akontese dala-tolu ona tanba ne’e husu ba PN atu hamosu lei ruma hodi uza ba situasaun kalamidade.

“Ita haree oinsá mak hamosu tiha lei ruma hodi ita uza ba kalamidade, tanba nasaun seluk la uza ona Estadu emerjénsia. Ita iha kapasidade halo lei ruma ka lae?,” Xefe bankada CNRT hatutan.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here