MInistru Edukasaun Juventude no Desportu, Armindo Maia

DILI, 26 outubru 2020 (TATOLI)—Ministériu Edukasaun Juventude no Desportu ho UNICEF iha Timor-Leste, iha segunda ne’e, hala’o worshop ida ho tema “Edukasaun mak dahuluk no edukasaun ba ema hotu” liliu ko’alia kona-ba teknolojia informasaun no komunikasaun (ICT-sigla inglés) ba inovasaun edukasaun iha Timor-Leste (TL).

Ministru Edukasaun Juventude no Desportu Armindo Maia ho Reprezentante UNICEF iha TL, Valérie Taton maka halo abertura ba worshop ne’ebé hala’o iha Sentru Konvensaun Dili (CCD-sigla portugés).

Sorumutu ne’e atu kompartilla informasaun kona-ba dezenvolvimentu no inovasaun uza teknolojia iha setór edukasaun ba estudante, manorin na’in sira, Ministériu Edukasaun no entidade sira seluk hodi aselera prosesu dezenvolvimentu  setór edukasaun iha rai-laran.

Governante ne’e konsiente katak fatór infraestrutura sai mós dezafiu ba estudante sira atu asesu ba inovasaun ICT.

“Iha konferénsia ne’e ita sei premite atu kompartilla ita-nia esperiénsia sira buka aprende ba malu hodi esplora potensia atu bele aselera progresu iha edukasaun,” Armindo Maia hateten iha ninia diskursu ohin.

Iha biban hanesan Reprezentante UNICEF iha TL, Valérie Taton, informa teknolojia informasaun no komunikasaun sei oferese oportunidade ba labarik sira ho defisiénsia fiziku bele asesu edukasaun inkluziva.

“Ita haree hela oinsá atu hafera bareira sira ne’ebé mak durante ne’e difikulta labarik sira atu asesu ba inovasaun edukasaun,” nia hateten.

Durante Estadu Emerjénsia UNICEF apoiu ona MEJD hodi hanorin labarik sira liuhusi publikasaun televizaun, radiu inklui lansa plataforma online para estudante sira labele lakon matéria durante pandemia globál COVID-19.

Worshop ne’e partisipa husi estudante, profesór no entidade hotu ne’ebé hala’o ona iha CCD durante loron rua hahú 26 fulan-outubru no sei ramata iha loron 27 fulan hanesan.

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here