Cleto Suzano Afonso. Imajen/Espsiál

DILI, 27 outubru 2020 (TATOLI)-  Atleta Cleto Suzano Afonso, nu’udár ajente FALINTIL-Forsa Defeza Timor-Leste (F-FDTL) Komponente Terrestre Baucau, kompromete sei hamorin no kontinua hamorin  instituisaun F-FDTL nia naran liuhosi ninia partisipasaun iha eventu bodybuilding Timoroan.

Prestasaun ne’ebé Cleto hatudu hodi manan taxa dala-rua tuituir-malu iha klase ne’ebé la hanesan iha mundu bodybuilding Timoroan  nu’udar esforsu ka hakat ne’ebé sai ona alvu ba Cleto atu sai eroi foun iha Timor foun no luta foun ba dezenvolvimentu nasionál.

Prosesu hosi Cleto ninia prestasaun to’o hamorin instituisaun F-FDTL, mak nia hahú ativu hodi tuir treinamentu kona-ba bodybuilding iha Dili iha tinan 2007 hamutuk ho atleta seniór sira, maski  tempu ne’ebá nia sei tuur iha banku eskola sekundáriu.

Iha 2010, Cleto kompete ba tropa, tuir vaga ne’ebé fó sai hosi instituisaun F-FDTL, konsege pasa, no kontinua dezenvolve desportu bodybuilding.

“Iha 2014, ha’u kompete iha Dili lori grupu Gym Timor Plaza, maibé bainhira komisaun organizadora lee naran, ha’u reprezenta duni instituisaun F-FDTL, ikus mai ha’u konsege okupa pozisaun kuartu lugár,” Cleto konta ninia esperiénsia ba Agência Tatoli, ohin, bainhira   hala’o vizita mai edifísiu Agência TATOLI  iha Faról, Dili.

Iha 2018, Cleto kompete iha Dili ba kategoria foun ne’ebé ho naran klase Mr. Physique, tanba falla uitoan, entaun Cleto tenke okupa kintu lugár.

Iha tinan 2019, Cleto reprezenta instituisaun F-FDTL, liuhosi grupu strong gym ne’ebé antes ne’e nia rasik envolve  ba, hamutuk ho atleta na’in-tolu hosi F-FDTL, no na’in-rua la pasa ba semi finál, Cleto mesak mak pasa no konsege sai kampiaun iha eventu ne’e hanesan primeiru lugár iha Mr. Physique.

Iha tinan 2020, komisaun organizadora konvida tan atleta hosi F-FDTL atu kompete, maski tempu preparasaun limitadu, maibé, Cleto konsege aproveita didi’ak tempu hodi treinu, no konsege sai nafatin kampiaun ba daruak iha klase Mr. Physique.

“Segredu boot liu ne’ebé lori ha’u bele sai manan na’in dala-rua tuituir-malu, maka badinas no dixiplina, ho mentalidade  tenke di’ak. Tenke dixiplina iha konsumu hahán ne’ebé bele han no proibidu. Dala-ruma mós hemu tua, maibé la’ós hemu hanesan ema lanu ten sira, no ha’u nunka fuma sigarru,” Cleto fó ninia tips kuidadu an, kuidadu stamina no kuidadu saúde.

Cleto sente orgullu bainhira manan taxa liu-liu iha tinan ida ne’e, tanba ho situasaun tempu ne’ebé limitadu, maibé sempre dixiplina hodi treinu, tanba hanoin katak, la fasil ba ema ida atu sai kampiaun ba dala-rua.

Ba futuru, hanesan timor-oan Cleto sempre prontu atu promove no dezenvolve rai-ne’e liuhosi desportu ida-ne’e, maibé, depende ba komisaun organizadora liuliu Sekretária Estadu Juventude no Desportu ne’ebé hakarak atu promove talentu joven sira nian.

Kona-ba taxa ne’ebé nia hetan iha kompetisaun bodybuilding liuliu hanesan kampiaun iha klase Mr. Physique, Cleto konsidera katak, ida-ne’e hanesan lembransa ida ba instituisaun F-FDTL katak, nia mós sai ona hanesan kampiaun tuituir-malu iha eventu ida-ne’e.

Maski nune’e, Cleto ladún satisfás ho prémiu ne’ebé nia hetan iha eventu ne’e tanba tuir nia, valór osan $400,00 ba primeiru lugár hosi klase Mr. hysique, ne’e ki’ik liu no la konsege reembolsa osan ne’ebé nia rasik gasta durante hala’o treinamentu to’o partisipa iha eventu ne’e.

“Kona-ba osan ne’ebé mak sira fó ba ami, tuir loloos ne’e la to’o. Tanba osan ne’ebé mak ami gasta durante tempu preparasaun nian, kuaze $2.000,00,” Cleto espresa nia insatisfasaun.

Ofisiál treinadór Tenente Baldino Julião António Martins, sente orgullu tebetebes tanba ninia atleta Cleto konsege okupa primeiru lugár iha eventu ne’e, no konsidera prestasaun ida-ne’e hanesan eroi foun ba rai ida-ne’e iha tempu ohin loron nian.

“Ha’u orgullu tebetebes no ha’u nia lia-fuan simples ne’ebé fó motivasaun ba atleta sira maka, ita nia aman sira sai eroi, tanba sira kontra inimigu. Maibé, agora iha ita nia tempu la presiza atu halo tan hanesan saida mak uluk ita nia aman sira halo. Ita tenke esforsu de’it hodi sa’e palku no manan taxa ida maski tama de’it iha torneiu ida -ne’e mós orgullu ona, tanba bele konsidera hanesan eroi foun iha tempu ohin loron. Ita koko mantein atu hamorin nafatin, maibé iha situasaun ho kondisaun ne’ebé mak diferente,” treinadór ne’e espresa.

Kompetisaun bodybuilding Timoroan ne’ebé realiza iha sábadu (24/10), iha Timor Plaza Dili, ho nia klase sira mak hanesan Mr. Physique, Mr. Muscle, no Mr. body builder, no Cleto mak okupa primeiru lugár iha klase Mr. Physique, nia rasik promete katak, sei esforsu maka’as atu iha eventu tuir mai okupa klase  Mr. Muscle.

Cleto moris iha Maliana, 26 abríl 1987, remata ona ninia estudu iha área relasaun internasionál  iha Díli Institute of Technology (DIT), no oras ne’e iha ona oan mane na’in rua.

Jornalista   : Cipriano Colo

Editór        : Francisco Belo

 

HAKEREK NO HATÁN

Please enter your comment!
Please enter your name here