Karreta ne’ebé sidadaun Filipina na’in-tolu uza treinu hodi harii fali bandeira RDTL iha rai no sama ba mai. Imajen/foti iha Facebook

DILI, 26 outubru 2020 (TATOLI) – Komandu Polísia Nasionál Timor Leste (PNTL) Munisípiu Dili detein ona sidadaun Filipina na’in-tolu, ne’ebé treinu karreta iha área Tasi-tolu, uza fali bandeira Repúblika Demokrátika Timor Leste (RDTL) hanesan sinál tau rai leten no rezulta karreta ba-mai sama halimar bandeira RDTL ne’e.

Portavós Komandu Jerál PNTL, Superintendente Xefe, Arnaldo de Araújo. Imajen Tatoli/Eugénio Pereira

“Kazu ne’e konsidera flagrante delitu, tanba ne’e PNTL sei prosesa tuir lei hodi fó xamada ba sidadaun Timoroan inklui sidadaun estranjeiru atu respeita bandeira sagrada ne’e,” portavós komandu jerál PNTL, Superintendente Xefe, Arnaldo de Araújo, informa ba jornalista, ohin, iha komandu jerál PNTL, Caicoli, Dili.

Arnaldo de Araújo esplika, parte PNTL konsidera sidadaun Filipina na’in-tolu ho inisiál MD, JDG, no MN viola lei, tanba la respeita bandeira RDTL nu’udár bandeira sagrada no símbolu nasaun Timor-Leste.

Nia mós konta tuir kronolojia hosi kazu ne’e katak, iha Domingu dadeer (25/10), komunidade no Konsellu Polisiamentu Komunitária (KPK) hetan sidadaun feto na’in-tolu hosi Filipina ne’e treinu hela karreta iha área Tasi-tolu, Aldeia 12 Outubru, Suku Comoro, Postu Administrativu Don Aleixo, Munisípiu Dili, uza bandeira RDTL ki’ik (banderola) ne’ebé tidin ba rai hanesan símbolu no karreta ba-mai sama símbolu nasaun nian ne’e.

“Ho situasaun ne’e ita nia sidadaun sira komunika kedan ba PNTL, hodi halo kedan atuasaun no detein sira hodi submete ba prosesu investigasaun,” portavós Komandu Jerál PNTL ne’e haktuir.

Jornalista : Eugénio Pereira
Editór       : Francisco Belo

HAKEREK NO HATÁN

Please enter your comment!
Please enter your name here