Portavós Komandu Jerál PNTL, Superintendente Xefe, Arnaldo de Araújo. Imajen Tatoli/Eugénio Pereira

DILI, 26 outubru 2020 (TATOLI) – Hafoin simu rezultadu investigasaun hosi komandu Polísia Nasionál Timor-Leste (PNTL) Munisípiu Liquiça, parte Ministériu Públiku (MP) haruka ona kazu oho Joaquim dos Santos da Silva, ba Tribunál hodi submete ba prosesu julgamentu.

Portavós Komandu Jerál PNTL, Superintendente Xefe, Arnaldo de Araújo informa, rezultadu investigasaun PNTL hatudu katak, vítima hetan oho hosi suspeitu PSJ hafoin konvida matebian ba hemu tua hamutuk iha mota-laran.

“Hafoin oho vítima, suspeitu halai hosi Liquiça ba subar iha família balun iha Dili no parte Servisu Informasaun Polísia (SIP) buka tuir, halo kedan detensaun no entrega ba Komandu PNTL Liquiça hodi halo investigasaun. Hafoin konklui investigasaun, aprezenta ona kazu ne’e ba Ministériu Públiku no suspeitu nia kazu ba ona Tribunál atu submete ba prosesu tuirmai,” Arnaldo hateten lia hirak ne’e ba jornalista sira , ohin, iha Komandu Jerál PNTL, Caicoli, Dili.

Portavós Komandu Jerál PNTL ne’e klarifika katak, kazu omisídiu ne’ebé akontese iha kinta (22/10), rezulta vítima Joaquim do Santos da Silva, mate iha área mota-laran, Aldeia Laclo-Lema, Suku Dato, Postu Administrativu Liquiça-Vila, Munisípiu Liquiça, kauza hosi problema hadau-malu fatin suru rai-henek.

“Suspeitu lori tudik sona vítima iha parte kotuk liman karuk nian, rezulta vítima monu, raan sai maka’as to’o mate iha fatin. Suspeitu PSJ oho Joaquim tanba de’it hadau-malu fatin suru rai henek iha mota-laran,” Arnaldo konta tuir bazeia ba rezultadu investigasaun.

Nia dehan, iha momentu ne’ebá, parte PNTL lori kedan mate isin ba Ospitál Nasionál Guido Valadares (HNGV) hodi halo autópsia no entrega ona mate isin ba família hodi hala’o serimónia funerál iha ninia moris fatin.

Jornalista   : Eugénio Pereira

Editór        : Francisco Belo 

HAKEREK NO HATÁN

Please enter your comment!
Please enter your name here