UNICEF.

Imajina fali edukasaun iha períodu pós-COVID-19: hasa’e/aumenta aprendizajen dijitál iha Timor-Leste

Timor-Leste prepara hela konferénsia primeiru kona-ba teknolojia informasaun no komunikasaun (ICT) no inovasaun iha edukasaun. Iha kontestu ne’e, Ministru Edukasaun no Reprezentante UNICEF Timor-Leste nian hato’o ideia balu kona-ba importánsia aprendizajen dijitál, teknolojia no inovasaun nian, atu asegura asesu ba aprendizajen ne’ebé iguál no ho kualidade ba labarik hotu-hotu.

Husi:

Armindo Maia no Valérie Taton  

Tinan 2020 mak tinan ida ne’ebé lori aprendizajen oioin ba ita.

Tinan ho aprendizajen katak pandemia bele hapara mundu iha nia dalan.

Tinan ho aprendizajen katak inovasaun no mudansa mak importante.

Tinan ida ne’ebé halo ita deskobre katak normalidade foun la’ós ‘posivel’ de’it, maibé mós ‘esensiál’.

Ita la bele fila fali ba kotuk.

Konsekuénsia husi pandemia COVID-19 to’o primeiru iha Timor-Leste iha fulan Marsu tinan ida ne’e. Loron rua depoizde konfirma kazu primeiru, Governu deside atu taka eskola sira nu’udar medida preventivu atu proteje alunu sira, no mós kontribui ba esforsu nasionál atu hapara transmisaun virus nian.

Derepente, kuaze labarik na’in 400,000 iha Timor-Leste la bele ba eskola ona.

Ita hatene pandemia COVID-19 halo krize aprendizajen boot liután iha mundu tomak. Ita seidauk hatene kona-ba impaktu husi eskola ne’ebé taka durante fulan tolu iha Timor-Leste ba labarik sira nia aprendizajen. Molok pandemia COVID-19, ita estima katak kuaze labarik na’in 40,000 mak la atende eskola (out-of-school) iha Timor-Leste. Eskola sira ne’ebé taka aumenta tan dezafiu ne’ebé eziste ona atu fornese edukasaun ho kualidade ba labarik atus-rihun-resin ne’ebé ho idade atu ba eskola iha Timor-Leste.

Agora ne’ebé eskola loke fila fali ona, ita haree kona-ba lisaun ne’ebé ita aprende durante tempu ne’ebé sira sei taka. Ita iha determinasaun atu haree oinsá ita bele kontinua husi fundasaun ne’ebé ita konsegue harii ona. Ita bele orgullu katak bainhira eskola sira taka, iha semana ida de’it nia laran, Ministériu Edukasaun, Juventude no Desportu, ho suportu husi UNICEF, dezenvolve inisiativa ‘Eskola Ba Uma’, ho aprendizajen liuhosi programa televizaun, rádiu no online ne’ebé harii ho tempu lalais liu.

Maski iha buat barak atu selebra, maibé iha mós buat barak atu analiza didi’ak. Proporsaun ki’ik de’it husi alunu na’in 400,000 ne’ebé afeitadu husi eskola taka mak iha kapasidade atu asesu aprendizajen online ho regulár. Konektividade internet ne’ebé la-di’ak, kustu aas no falta koñesimentu kona-ba oinsá atu uza plataforma online atu aprende sai dezafiu boot tebes.

Maibé ida ne’e mak aspeitu edukasaun nian ne’ebé ita koko atu esplora liután iha mundu ida ne’ebé muda ba beibeik. Ita koko atu imajina fali oinsá ita bele aproveita internet no teknolojia atu ajuda labarik hotu-hotu atu hetan edukasaun ka kontinua aprende.

Ema barak sei husu, ho loos, kona-ba oinsá ita bele foka atu introdús ICT no inovasaun iha rai ida bainhira la iha infraestrutura, ka infraestrutura mínimu, atu suporta ida ne’e, ka bainhira labarik barak iha rai laran la iha asesu ba sala de aula adekuadu ka livru eskola nian. Karik sira mak razaun atu esplora modelu edukasaun mistu atu aselera mudansa iha labarik sira nia edukasaun.

Karik teknolojia bele reposta atu halo edukasaun inkluzivu liu. Purezemplu, bele tradús materiál aprendizajen dijitál ba língua lokál sira. Bele adota aprosimasaun husi Universal Design for Learning (Dezeñu Universál ba Aprendizajen) atu prodús formatu ne’ebé asesível ba labarik sira ho defisiénsia, hanesan livru dijitál (e-books) ho linguajen sinál ka livru audio.

Konferénsia ‘Imajina Fali Edukasaun: ICT no Inovasaun iha Timor-Leste’ iha 26 no 27 Outubru mak pasu primeiru atu avalia ho krítiku lisaun ne’ebé ita aprende husi Timor-Leste nia tentativa primeiru atu implementa solusaun edukasaun online iha nasaun tomak. Ita fiar katak maski iha dezafiu, maibé ita bele alkansa halo pasu balu atu fornese edukasaun asesível no ho kualidade liuhosi aprosimasaun aprendizajen ne’ebé mistu: esplora oportunidade sira ba parseria, aumenta konektividade, redús kustu, dezenvolve konteúdu apropriadu bazeia ba kuríkulu nasionál no fó kapasitasaun atu ajuda alunu no manorin sira uza instrumentu no rekursu sira ne’ebé disponivel ho másimu.

Ita iha oportunidade atu sees husi modelu eskola husi sékulu liubá no imajina fali eskola iha futuru. Iha eskola futuru ne’e, aprendizajen sei akontese la’ós de’it iha sala de aula. Manorin sei hatene oinsá atu uza teknolojia no hanorin ho maneira seluk. Labarik sira sei iha oportunidade atu uza teknolojia atu aprende no responde ba dezafiu ohin nian no futuru nian.

Ita deve ida ne’e ba labarik Timoroan sira. Ita deve ida ne’e ba sira atu enxe lakuna dijitál ne’ebé eziste, atu habele labarik ida-idak realiza nia direitu ba edukasaun ho kualidade no alkansa nia potensiál, atu habele sira kompete iha plataforma globál ne’ebé konektadu, dirije husi teknolojia, no online liután loron ba loron.

Armindo Maia, Ministru Edukasaun, Juventude no Desportu

Valérie Taton, Reprezentante UNICEF iha Timor-Leste

HAKEREK NO HATÁN

Please enter your comment!
Please enter your name here