Prezidente Komisaun A PN, Joaquim dos Santos. Imagen Antonio Goncalves.

DILI, 22 outubru 2020 (TATOLI)—Komisaun A (Justisa no Konstitusionál) iha Parlamentu Nasionál sei halo konsultasaun públiku kona-ba projetu-lei podér lokál no lei eleisaun munisipál iha tinan 2021.

Prezidente Komisaun A, Deputadu Joaquim dos Santos, informa iha fulan janeiru no fevereitu 2021 halo konsulta públiku kona-ba lei rua refere iha Munisípiu Bobonaro.

“Ami halo apresiasaun ba lei podér lokál no lei eleisaun munsipál ne’e sei hahú hosi Bobonaru. Uluk, ami ba tiha ona Suai maibé projetu-lei ne’e, ami mós hein hela Governu atu prepara proposta kona-ba finansiamentu podér lokál ne’e,” nia informa ba jornalista sira iha resintu Parlamentu Nasionál, kuarta ne’e.

Komisaun A mós hanoin ona atu halo tán lei finansiamentu lokál ne’ebé pakote ida ho projetu-lei podér no lei eleisaun munisipál ne’e.

Prezidente Komisaun A ne’e fundamenta, bainhira iha 2021 mak hamosu konsesu ba lei ne’e entaun bele aprova.

“Se konsensu, ha’u hanoin 2021 nia laran ita bele rezolve problema ida-ne’e para munisípiu sira-ne’ebé iha ona kondisaun bele ona eleisaun ba sira-nia prezidente munisipál, ita planu hela ida-ne’e ba  iha 2021 nian. Maibé seidauk halo kalendáriu,” nia hateten.

Nia haktuir, konsulta públiku ne’e kontinuasaun de’it Prezidente sesante Deputada Carmelita Caetano Moniz nian ne’ebé halo ona konsulta públiku iha Suai.

“Agora komisaun planu hela atu halo 13 audiénsia hahú hosi Suai (hala’o tiha ona), tinan oin iha Bobonaro depois ikus mak Dili karik. Lei podér lokál hanesan projetu-lei tanba uluk Prezidente Repúblika veta tiha ona depois kaduka, depois deputadu grupu ida  foti no reformula fali aprezenta hanesan projetu-lei,” nia hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here