MTKI hamutuk ho PNTL hala’o konférensia impresa kona-ba feira promove gastronomia, segunda (21/10), iha CCD. Imajen Tatoli/Egas Cristovão

DILI, 22 outubru 2020 (TATOLI)–Diretora Nasionál Empreendimentu Atividade Produtu Turíztiku hosi Ministériu Turizmu, Komérsiu no Indústria (MTKI), Maria Ernestina Lopes, informa parte ministériu sei realiza feira lorokraik durante loron rua hodi promove produtu gastronomia Timor-Leste iha jardín BJ. Habibie, Bidau Santana.

“Feira lorokraik ne’e atu promove gastronomia sabor Timór ka hahán tradisionál no promove ita-nia artezenatu hanesan sasán antigu no tais sira,” Diretora Nasionál informa liuhosi konférensia imprensa ne’ebé hala’o iha Sentru Konvensaun Dili (CCD, sigla portugés), kinta ne’e.

Atividade ne’e sei fó oportunidade ba restaurante atu promove produtu no tein ai-han ho sabor Timor-Leste, nune’e bele atrai vizitante koko.

“Restaurante rejistadu iha ami-nia fatin hamutuk  30, ne’ebé seidauk inklui komunidade ne’ebé hakarak partisipa,” nia akresenta.

Iha fatin fatin hanesan, Diretór  Jerál Turizmu, José Filipe Dias Quintas, hateten atividade nu’udar polítika Governu ne’ebé sempre realiza kada tinan.

Nia konsidera, feira ne’e nu’udar atividade Governu liuhosi MTKI, hodi fó oportunidade ba setór privadu bele partisipa hadi’a atividade ekonómika hafoin krize COVID-19.

“Agora polítika Governu kontinua promove turizta doméstika no mós apoiu ba rekuperasaun ekonómika tanba eventu ne’e halai mós ba atividade komersiál no sei benefisia maluk ne’ebé halo negósiu ba ai-han, bebidas no mós artezenatu,” nia informa.

Tanba ne’e, Diretór Jerál ne’e husu partisipante feira ne’e atu kontinua kumpre regra saúde nian.

Aleinde ne’e, eventu ne’e fó oportunidade di’ak ba joven sira hodi hatudu kreatividade.

Xefe Suku Bidau Santana,  João Paulo Soares, hateten nia parte prontu kontribui fó susesu ba atividade ne’e.

Segundu Komadante Polísia Nasionál Timor-Leste (PNTL) munisípiu Dili, Superientidente Euclides Belo, dehan membru sira prontu asegura kualkér eventu ne’ebé maka Estadu organiza.

Biban ne’e, nia apela ba entidade hotu atu kontribui fó susesu ba eventu ne’e hodi ema hotu bele halo atividade ne’e iha situsaun hakmatek no koduzivu.

“Husu joven sira atu kolabora tanba Polísia sei fó seguranasa másima hodi atividade bele la’o ho di’ak, nune’e ema konsidera Dili nu’udar sentru negósiu,” nia fó hanoin.

Entertantu feira ne’e sei realiza sei halao iha Jardim B.J Habibie aban (23/10) no sei sei termina iha sábadu (24/10).

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here