Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu. Imajen Tatoli/António Gonçalves

DILI, 21 outubru 2020 (TATOLI)Iha reuniaun Konsellu Ministru (KM) kuarta ne’e, Ministru Justisa, Manuel Cárceres da Costa, aprezenta projetu proposta lei kona-ba Rejime Jurídiku ba Asosiasaun Públika Profisionál no hetan ona aprovasaun.

“Rejime jurídiku ne’e atu asegura katak profisaun sira ne’ebé iha ligasaun ho interese públiku tenke regula iha kuadru legál nia-laran ne’ebé respeita ba ninia autonomia,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha Palásiu Governu.

Ho diploma ne’e, Governu propoin ba Parlamentu Nasionál atu fó ordenamentu jurídiku ba kuadru legál no tenke observa kriasaun orden no kámara profisionál sira

Maski nune’e, permite ninia dezenvolvimentu ho respeitu ba Konstituisaun no soberania nasionál atu kontribui reforsa konfiansa iha kualidade téknika no étika profisionál Timor-Leste.

Nune’e mós, ho rejime jurídiku ne’e loke dalan ba organizasaun profisionál sira atubele hambrik rasik no iha artikulasaun di’ak liu ho Estadu.

Organizasaun profisionál mak tama kategoria ne’e maka hanesan asosiasaun enfermeira, médiku no mós advogadu sira.

Hosi rejime jurídiku ne’e, bele loke dalan ba kada asosiasaun aprezenta ninia estatutu hodi nune’e bele hambriik legalmente.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here