Jogadór AD.SLB ho Assalam hadau malu bola. Imajen/Mídia FFTL

DILI, 21 outubru 2020 (TATOLI) – Ekipa futeból estimadu Makikit Laulara ka AD.SLB, ohin, liuhosi jogu iha Estádiu Munisipál Dili, tebes sai Assalam FC hosi kampu kopa Federasaun Futeból Timor-Leste   ho golu 2-0.

Ho vitória ne’ebé  AD. SLB hetan hodi tebes sai Assalam ne’e lori SLB manan tiketi ba final ne’ebé atu hala’o iha Estádiu Café Gleno,  Domingu (25/10), hodi enfrenta ekipa jigante Lalenok United FC.

Hanesan jogu baibain hala’o kampu laran, ekipa rua uza tátika oi-oin hodi buka hatama golu. Nune’e mós Assalam esforsu maka’as liuhosi joga ho kalma no la ansi hatama golu bainhira seidauk iha aserta di’ak.

SLB joga ho modelu bola as ka bola “long” nune’e iha minutu 8, Mozinho de Lima (10) hetan bola pasa ida ho kalma hosi nia amigo João Pedro (7) hodi fura kedan rede Assalam lori rezultadu ba golu ida (1) ba SLB no Assalam hela ho zero (0).

Hosi golu ne’e halo Assalam trauma maka’as hodi muda kedan estratéjia jogu maibé laiha mudansa. Nune’e tama ba minutu 45+2 oportunidade monu tan ba SLB, iha ne’ebé defeza Filipe Oliveira (4) hetan bola pasa hosi João Pedro konsege hatama tan golu ida hodi lori rezultadu 2-0 hodi aguenta to’o intervalu.

Hakat ba segunda parte Assalam esforsu maka’as nafatin hodi halo mudansa ba rezultadu, maibé esforsu hirak ne’e hela ho  esforsu de’it tanba la prodús golu ruma to’o árbitru huu apitu naruk hodi termina jogu iha minutu 90.

Jogu entre parte rua ne’e bele dehan espesiál tanba asiste diretamente hosi karizmátiku Kay Rala Xanana Gusmão, mezmu Xanana labele akompaña to’o jogu termina tanba kondisaun saúde.

Treinadór SLB, Efren Jeronimo hateten, ekipa no família boot, inklui adeptu SLB  kontente bele ultrapasa ona ba finál.

“Jogu ohin kapás. Ami sente kontente loos bele hakat ona ba finál. Ami sei esforsu para sai kampiaun,” hateten Efren Jeronimo.

Iha fatin hanesan treinadór Assalam, Gaspar Quintão, hateten, sira-nia parte triste maibé ida ne’e mak rezultadu jogu.

“Ohin ne’e falla hosi ami nia jogadór, maibé laiha buat ida. Ida ne’e mak jogu iha lakon no manan. Ba oin ami sei hadi’a di’ak liu tan,” nia dehan.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here