Governu Apresentasaun Plano Rekoperasaun Ekonómika Reprezentante Povu iha uma fukun Parlamento nasional. iha Sala Plenáriu PN, Tersa (20/10). Imajen Tatoli/Egas Cristovão

DILI, 20 outubru 2020 (TATOLI)—VIII Governu Konstitusionál aprezenta medida sia (9) hosi planu rekuperasaun ekonómika ba reprezentante povu iha uma fukun Parlamentu Nasionál (PN).

“Ita avansa ho pakote rekuperasaun ekonómika ne’e, medida balun la’o tiha ona hodi gasta ona millaun $91.7 hodi implementa medida resposta hamutuk 19 tanba ne’e iha ámbitu planu rekuperasaun ekonómika ne’e ita konsidera medida sira hanesan agrikultura, turizmu, abitasaun, edukasaun, saúde, protesaun sosiál, aspetu institusionál, instalasaun fibra ótika no fonte enerjia renovavel,” Ministru Prezidénsia Konsellu Ministru, Fidelis Manuel Leite Magalhães, esplika medida prinsipál hirak ne’e liuhosi plnária, Parlamentu Nasionál, tersa ne’e.

Governu identifika planu ne’ebé hala’o ona liuhosi faze dahuluk ho forma fazeada no kurtu prazu entre jullu no dezembru 2020, ho orsamentu millaun $113,4 hodi finánsia atividade hotu liuhosi Fundu COVID-19 iha OJE 2020.

Hosi montante orsamentu millaun $113 ne’e atribui ba programa Cesta Básica hahú hosi fulan-novembru no dezembru millaun $71,5, subsídiu retoma implementasaun hahú hosi fulan jullu no dezembru ho kustu estimada millaun $35, dispensa kontributiva implementasaun hahú hosi jullu to’o dezembru millaun $3,6 no apoia espesiál ba traballadór informál hodi implementa entre outubru no dezembru iha tinan ida-ne’e ho montante millaun $3,3.

Iha pájina 15 to’o 20 deskreve sei implementa medida adisionál hamutuk 60 relasaun ho ekon’omiku pos COVID-19 iha médiu, no tempu naruk no distribuída kada medida múltiplas iha área sira no setór ekónomika prioritáriu.

Ministru Fidelis esplika, planu rekuperasaun ekonómika ne’e fahe ba etapa rua, etapa dahuluk ninia objetivu maka atu hamenus impaktu COVID-19 nian liuhosi reposta prazu badak (liuliu iha semester daruak tinan 2020 nian).

Etapa daruak ida ho medida sira médiu prazu nian ba rekuperasaun ekonómika (ne’ebé kobre períodu tinan 2 to’o tinan 3).

Iha faze dahuluk ne’e atu evita lakon empregu, apoia família sira no prevene taka empreza sira ho objetivu atu mantein nível konsumu no padraun moris nian.

Medida sira ba prazu badak inklui fahe bote nesesidade bázika nian (voucher) ho valór $25 ba kada ema (uza rejistu uma-Kain), subsídiu rekuperasaun fulan haat ba empreza sira-ne’ebé rejista lakon rendimentu, no izensaun kontribuisaun sira ba seguransa sosiál.

Faze daruak ne’e atu hatán ba dezafiu sira ne’ebé kauza hosi pandemia, no mós ba problema estruturál sira. Faze ne’e kobre area sira hanesan:

  1. Agrikultura (agro-indústria ki’ik). Foku ba kafé liuhosi subsídiu ida hodi apoia renovasaun plantasaun sira) aleinde ai-kameli no ai-teka. Ba oin, Governu prevee implementasaun polítika substituisaun (parsiál) ida ba importasaun, liuliu hosi foos.
  2. Setór ne’e ninia ojetivu mak atu kria empreza estadu ida hodi implusiona setór ne’e, hadi’a edukasaun no formasaun profisionál, reabilita infraestrutura hanesan rezidénsia administradór nian tuan sira no estrada rurál sira no promove ekoturizmu ho kombina fatin alojamentu nian ho kafé laran ka natar.
  3. Planu ne’e ninia objetivu maka atu implementa programa abitasaun sosiál nian ida- ne’ebé Institutu Nasionál Seguransa Sosiál ka instituisaun foun ida maka sei jere, nune’e bele alkansa universalizasaun saneamentu báziku, bee no enerjia elétrika iha nasaun laran tomak.
  4. Setór ne’e ninia objetivu mak atu aumenta proporsaun orsamentu Estadu ne’ebé alokadu ba setór ne’e, aumenta númeru eskola CAFE sira nune’e mós rede eskola sekundária, pré-eskolár no sentru formasaun profisionál no promove manutensaun no rekuperasaun edifísu eskola nian sira.
  5. Saúde. Setór ho ninia objetivu maka aumenta gastu rekorente sira hodi hadi’a kualidade serviisu saúde nian, fortalese apoiu finanseiru no tékniku sira ba programa prinsipál sira hanesan saúde iha família, saúde eskolár no saúde iha serbisu, investe iha infraestrutura no hadi’a formasaun ba pesoál saúde nian.
  6. Protesaun Sosiál ninia objetivu mak atu kria mekanizmu pagamentu alternativu atu evita selu osan direta no hamenus kustu, aumenta kobertura ‘Bolsa da Mãe; aumenta protesaun (ezemplu, mate iha rejime la’ós kontributivu) implementa programa empregu ativu nian no avalia viabilidade hosi rendimentu báziku universál ida.
  7. Aspetu institusionál ninia intensaun ne’e maka aprova lejizlasaun hotu-hotu ne’ebé pertinente ba kestaun fundiária sira, elabora no aprova lejizlasaun emprezariál hanesan rejime falénsia hadi’a funsionamentu tribunál sira no reforma administrasaun públika.
  8. Instalasaun fibra ótika ho ninia objetivu maka implementasaun fibra óptika iha nasaun laran tomak, liuhosi fiu iha tasi okos ne’ebé liga Timor-Leste ba mundu tomak.
  9. Fonte enerjia renovavel, sustentavel no alternativa. Planu ne’e atu halo promosaun fonte enerjia renovaven sira, liuliu loro-matan, bee no anin.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here