Paulo Gally lori hela bola hodi hatama nia golu ba dala uluk. Imajen/Mídia FFTL

DILI, 20 outubru 2020 (TATOLI) – Ekipa futeból Lalenok FC konsege hada’u tiketi  ba finál kopa Federasaun Futeból Timor – Leste (FFTL), epoka ne’e, hafoin halakon “ganhar por pouco” ka menang tipis Boavista FC Timor 3-2,  ohin loraik, iha Estádiu Munisipál Dili.

Jogu ne’ebé hala’o iha Estádiu Munisipál Dili, Lalenok tebe sai Boavista hosi kopa FFTL. Enkuantu Lalenok rasik hein SLB no Assalam. Iha ne’ebé klube rua sei hala’o jogu iha kuarta aban (21/10) iha Estádiu Munisipál Dili, hodi hadau tiketi ba jogu final ne’ebé  atu hala’o iha loron  25 outubru ne’e, iha Estádiu Café Gleno.

Iha jogu minutu primeiru, ekipa rua hala’o kontra ho atake ba malu hodi buka se loos mak atu hatama golu uluk. Formatu ne’ebé ekipa rua  uza mak Boavista 4,3, 3 no Lalenok 4, 4, 2.

Hosi formatu ne’e Lalenok domina liu bola iha primeira parte hodi halo atrapalla jogadór Boavista, nune’e iha minutu rua defeza Boavista João Soares (29) halo fallansu iha grande area oin avansadu Paulo Gally (21) uza kedan oportunidade hodi hadau bola no marka kedan golu dahuluk hodi muda score ba 1-0.

Hosi golu Gally nian ne’e halo Boavista nia laran susar no esforsu maka’as liu tan. Esforsu hirak Boavista lori duni rezultadu iha minutu 29 João Soares konsege responde hodi hatama golu primeiru liu hosi bola barullu iha grande area oin Lalenok nian hodi muda rezultadu ba 1-1.

Golu ne’e halo adeptu Boavista nian hakilar tebe rai hanoin empata ona, maibé minutu sei naruk. Treinadór Lalenok Simón Elissetche iha kampu ninin halai ba mai hodi organiza jogadór sira.

Simón hakilar no orienta jogadór sira la saugati tanba liu de’it minutu ida jogadór Lalenok Hermínio de Sousa (15) hatama tan golu ida hodi muda rezultadu nakfilak ba 2-1. Nune’e, iha minutu 45+2 Elias Mesquita halo tan golu ida lori rezultadu golu dook uitoan ona hosi Boavista 3-1, halo adeptu Boavista laiha kedan lian.

Kontinua ba segunda parte Boavista liuhosi nia treinadór Miro Baldo Bento halo mudansa ba formatu no estratéjia jogu iha minutu 61 Fransyatma Kefy (21) prodús golu ida hodi dudu rezultadu rabat ba Lalenok 3-2.

Hosi rezultadu ne’e halo Boavista domina kampu laran ho kontra atake ne’ebé sériu maibé esforsu hela de’it ho esforsu rezultadu nafatin 3-1 to’o minutu 90 termina árbitru huu apitu naruk jogu refere to’o ona rohan. Nune’e, vitoria monu ba Lalenok.

“Ha’u sente kontente, antes atu hakat ba finál liuhosi prosesu ne’ebé naruk. Maibé ami sei esforsu hodi hala’o jogu di’ak iha finál hodi manan,” Simón hateten liuhosi konferénsia imprensa hafoin jogu remata.

Iha fatin hanesan treinadór Boavista, Miro Baldo konfesa katak, derrota ne’ebé sira hetan tanba fallansu hosi jogadór.

“Derrota ne’ebé ami hetan tanba fallansu hosi jogadór, golu primeiru hosi ami nia defeza mak halo sala rasik. Maibé prontu ne’e ami nia uma laran ami sei hadi’a ba jogu tuir mai labele akontese tan. Parabéns ba Lalenok, boa sorte iha finál,” Miro Baldo haktuir.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here