Prezidente Repúblika, Francisco Guterres Lú Olo. Imajen António Gonçalves

DILI, 19 outubru 2020 (TATOLI)–Prezidente Repúblika, Francisco Guterres ‘Lú Olo’, ohin, uza nia kbiit Konstitusionál hodi promulga Dekretu hosi Parlamentu Nasionál N.° 23/V-Orsamentu Jerál Estadu 2020.

Prezidente Repúblika konklui katak Dekretu Parlamentu Nasionál tuir presupostu no rekizitu ne’ebé iha konformidade ho dispozisaun aplikáveis Konstituisaun Repúblika no nia Lei sira, no mós kondisaun polítika ba nesesidade, konveniénsia no preménsia no nune’e, ohin, promulga Lei Orsamentu Jerál Estadu ba tinan-2020.

Parlamentu Nasionál aprova Orsamentu Jerál Estadu ba tinan-2020 ho valór globál millaun $1.497,04. Dotasaun orsamentu fahe tuir klasifikasaun ekonómika tuir mai: millaun $207,3 ba saláriu no vensimentus, millaun $563,0 ba Bens e Servisus, millaun $504,3 ba transferénsia públika, millaun $9,2 ba Kapitál Menor no millaun $213, 4 ba Kapitál Dezenvolvimentu.

Osan ne’ebé gasta tiha ona hosi janeiru 2020 to’o agora, liuhosi rejime duodesimal, tama mós iha OJE 2020 ne’ebé Prezidente Repúblika promulga ohin no Parlamentu Nasional haruka ona ba  Jornál Republika.

Nune’e, Orsamentu Jerál Estadu ba tinan-2020, ho montante total temi iha leten ne’e,   refere ba despeza ne’ebé halo tiha ona no sei hala’o  to’o dezembru 2020. Orsamentu ne’e inklui despeza ba estabilizasaun ekonomia hosi efeitu negativu COVID-19 no hosi udan no mota-sae iha sidade Díli, no sei kobre medida ba rekuperasaun ekonómika, iha ámbitu Planu Rekuperasaun Ekonómika, aprovadu hosi VIII Governu Konstitusionál, iha agostu 2020.

Dekretu Parlamentu Nasionál númeru 23/V, aprovadu hosi Parlamentu Nasionál iha 8 outubru 2020 no Prezidente Repúblika simu, iha 9 outubru 2020.

Komunikadu Imprensa

HAKEREK NO HATÁN

Please enter your comment!
Please enter your name here