Estudante na'in-72 iha Izrael. Imajen/Facebook: Mendonca.

DILI, 19 outubru 2020 (TATOLI)—Reprezentante povu iha uma fukun Parlamentu Nasionál (PN) husu Ministériu Negósiu Estranjeiru no Kooperasaun (MNEK) atu kontinua esforsu hodi bele lori fila estudante timoroan na’in-72 iha Israel tanba sira ramata ona sira-nia estudu. 

“Situasun ita-nia maluk estudante sira na’in-72 ne’ebé agora daudaun iha hela rai Israel, sira ramata ona estudu iha área agrikultura no sira hakarak atu fila-fali mai Timor-Leste. Tanba ne’e, hakarak hatutan sira-nia lian katak MNEK nia esforsu oinsá mak ita-nia estudante sira bele fila-fali mai,” Deputada Bankada FRETILIN, Nélia Menezes, levanta asuntu ne’e liuhosi plenária, Parlamentu Nasionál, segunda ne’e.

Tanba, tuir Deputada Nélia Menezes, estudante barak iha rai sira seluk fila ona ba sira-nia rain maibé estudante timoroan sira seidauk fila.

Reprezentante povu ne’ebé hatutan lian estudante na’in-72 ne’e husu Ministériu Negósiu Estranjeiru no Kooperasaun atu tau importánsia ba asuntu ne’e.

Hatán ba asuntu ne’e, Ministru Asuntu Parlamentár no Komunikasaun Sosiál, Francisco Jerónimo, hateten nia parte sei enkamiña preokupasaun ne’e ba ministériu relevante.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here