Imajen semitériu Santa Cruz hasai hosi anin leten. Imajen/Espesiál.

DILI, 19 outubru 2020 (TATOLI)—Vise-Prezidente Parlamentu Nasionál, Deputada Maria Angelina Sarmento Lopes, husu Governu atu halo intervensaun lalais ba atividade negósiu iha resintu semitériu Santa Kruz tanba konsidera estraga estéstika nasaun nian.

“Ha’u lamenta tebes. Governu presiza lalais atu halo intervensaun ruma ba semitériu Santa Kruz, fatin ne’ebé istóriku, movimentu manifestasaun 12 novembru akontese iha-ne’ebá maibé agora loron-loron ita haree grupu balun ka ema na’in-hitu ka na’in-ualu ba halo negósiu hodi fa’an hahan tasak iha semitériu nia oin. Ne’e ita haree ladi’ak ba ita-nia estéstika nasaun nian,” Deputada Partidu Libertasaun Populár ne’e levanta liuhosi plenária, Parlamentu Nasionál, segunda ne’e.

Razaun Deputada PLP levanta atividade negósiu iha rsintu Santa Kruz tanba ema ruma mai hosi li’ur sempre ba vizita fatin istóriku ne’ebé akontese 12 novembru 1991.

“Harii tán tiha ona uma rua ne’ebé opozisaun ho semitériu Santa Kruz, Governu presiza halo intervensaun lalais. Se lae, ema seluk bele ba halo tán uma iha fatin ne’e,” Vise Prezidente Parlamentu Nasionál ne’e fó hanoin ba Governu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here