Estudante timoroan iha Filipina aluga rasik aviaun atu fila-mai Timor-Leste
DILI, 19 outubru 2020 (TATOLI)—Xefe Bankada Partidu Demokrátiku (PD), Deputadu António da Conceição, husu justifikasaun ba Ministra Negósiu Estranjeiru no Kooperasaun (MNEK) no Ministru Ensinu Superiór, Siénsia no Kultura (MESSK) tanba estudante timoroan iha Filipina ameasa aluga rasik aviaun atu fila-mai Timor-Leste.
“Ha’u hakarak husu Ministra Negósiu Estranjeiru no Kooperasaun no Ministru Ensinu Superiór, Siénsia no Kultura, halo klarifikasaun ida ho eskritu ba Parlamentu Nasionál kona-ba pozisaun Governu nian relasionadu ho estudante repatriasaun iha Filipina. Estudante agora tau osan hamutuk atu selu rasik ka aluga aviaun fila-mai Timor,” Xefe Bankada PD ne’e levanta liuhosi plenária, segunda ne’e.
António husu responsabilidade Governu ninian relasaun ho estudante-sira ne’ebé atu selu rasik aviaun, enkuantu traballadór manán osan ne’e Governu mak selu aviaun hodi lori-fila sira mai Timor-Leste.
“Ha’u presiza justifikasaun ba ida-ne’e. Resposta ne’e tenke ba deputadu hotu-hotu hodi dehan katak se verdade, UNTL membru Governu no deputadu nia oan to’o hira,” nia hateten.
Maibé, tuir informasaun ne’ebé Agência TATOLI rekolla hosi fonte balun katak, oras ne’e estudante-sira tau osan hamutuk rihun $55 hosi estudante-sira hamutuk 60-resin maibé kada estudante ida selu dollar $900-resin.
Fonte ne’e dehan, estudante balun labele selu aviaun rasik tanba osan laiha tanba totál estudante ne’ebé oras ne’e hala’o estudu iha Filipina hamutuk na’in-100-resin.
Jornalista: Evaristo Soares Martins
Editór: Cancio Ximenes
