Sorumutuk, Sekretáriu Estadu Komunikasaun Sosiál, Merício Juvinal dos Reis ‘Akara’ no Prezidente IGE, Ermenegilda da Costa Laurentina, iha sala enkontru SEKOMS, Palásiu Governu. Imajen/Mídia SEKOMS

DILI, 18 outubru 2020 (TATOLI)–Sekretáriu Estadu ba Komunikasaun Sosiál (SEKOMS), Merício Juvinal dos Reis ‘Akara’, hala’o sorumutuk ho Prezidente Institutu Jestaun Ekipamentu (IGE, sigla portugés), Ermenegilda da Costa Laurentina, iha sala enkontru SEKOMS, Palasiu Governu, foin lalais ne’e, hodi haree posibilidade kooperasaun serbisu.

Tuir nota ne’ebé Agência Tatoli asesu iha domingu ne’e, Sekretáriu Estadu introdús no atualiza lala’ok programa ‘Naroman ba Suku’ ba responsável másima IGE hodi husu instituisaun ne’e nia apoiu solusiona preokupasaun komunidade iha suku, liuliu liga ho estrada no serbisu seluk ne’ebé iha relasaun ho kompeténsia institutu ne’e.

Hafoin rona esplikasaun hosi SEKOMS, Prezidente IGE hateten hanesan institutu públiku ne’ebé tutela ba Ministériu Obra Públika, bainhira atu halo serbisu ruma tenke hetan orientasaun hosi parte ministériu.

Maski nune’e, Ermenegilda da Costa sente haksolok tanba hetan oportunidade hola parte iha programa ne’ebé inisia hosi SEKOMS, liga ho institutu ba ekipamentu ne’e ninia knaar ba atendimentu emerjénsia, reabilitasaun estrada, normalizasaun mota no seluktán.

Iha enkontru ne’e, Prezidente IGE hato’o preokupasaun kona-ba serbisu mídia ne’ebé foti de’it notísia kona-ba kondisaun estrada ne’ebé a’at no ponte ne’ebé kotu, maibé hafoin IGE halo intervensaun hodi hadi’a estrada no ponte, mídia la halo atualizasaun ba novidade ne’e liuhosi publikasaun.

Kona-ba preokupasaun Sekretáriu Estadu Akara dehan, SEKOMS iha papél maka mobiliza mídia divulga atividade Governu, tanba ne’e nia parte sei husu mídia sira liuliu mídia estatál hanesan RTTL, E.P no Agência Tatoli, I.P inklui rádiu komunidade sira atu atualiza nafatin atividade Governu hodi hatan ba preokupasaun komunidade.

Akara informa mós katak, SEKOMS sei halo diálogu komunitáriu iha suku Soikili no Euquisse iha Laivai, munisípiu Lautém, ne’ebé sai mós alvu ba programa Naroman ba Suku, tanba ne’e sei konvida mós IGE partisipa iha diálogu ne’e hodi rona preokupasaun populasaun.

Hafoin implementasaun programa komunitáriu ne’e, IGE halo ona intervensaun hadi’a estrada iha suku Muapitine, munisípiu Lautém ne’ebé atinje ona 75% no tuir planu sei reabilita mós estrada iha suku Lore 2, hafoin ekipa tékniku institutu halo monitorizasaun.

Entretantu, programa Naroman ba Suku hanesan programa prioridade hosi SEKOMS ne’ebé ho intensaun atu fasilita komunidade suku asesu informasaun kona-ba prosesu dezenvolvimentu nasionál no lori Governu besik ba povu.

Jornalista: Cipriano Colo

Editora: Julia Chatarina

HAKEREK NO HATÁN

Please enter your comment!
Please enter your name here