Jogadór Assalam no ofisiál klube sira selebra vitória iha kampu Café Ermera, domingu (18/10). Imajen/Mídia FFTL

ERMERA, 18 outubru 2020 (TATOLI)—Ekipa AS Ponta Leste dada-an iha Estádiu Café Ermera, postu administrativu Gleno, munisípiu Ermera, bainhira kontra ninia adversáriu Assalam FC liuhosi auto golu, ne’ebé marka rasik hosi jogadór José Oliveira iha jogu oitavu finál kopa Federasaun Futeból Timor-Leste (FFTL), iha domingu lorokraik ne’e.

Jogadór Ponta Leste, José Oliveira, ho intensaun atu salva sai bola ne’ebé atu tama ba rede klubu ne’e rasik, maibé la konsege to’o ikus tama ba rede laran iha minutu 28 hodi hatuur rezultadu 1-0.

Hosi rezultadu ne’e Ponta Leste laiha direitu avansa ba jogu semi finál ne’ebé sei realiza semana oin mai.

Enkuantu Assalam iha direitu absoluta hodi ultrapasa ba jogu semi finál, ne’ebé sei kontra klube AD SLB Laulara ho naran koñesidu Makikit Laularan.

Auto golu ne’ebé akontese tanba bola barullu iha grande área Ponta Leste nia oin.

Esperansa boot Ponta Leste antes to’o minutu 90 bele hatama golu, maibé hafoin árbitru huu apitu naruk no termina jogu entre parte rua mantein ho score 1-0 hosi Assalam ba Ponta Leste.

Jogu ne’e dirije hosi árbitru Eufrásio Silva, juíz liña Romário Teti no António de Carvalho no árbitru rezerva Filomeno da Silva.

Jornalista: Hortêncio Sanchez

Editora: Julia Chatarina

HAKEREK NO HATÁN

Please enter your comment!
Please enter your name here