Padre Ilídio Correia. Imajen/Facebook

DILI, 18 outubru 2020 (TATOLI)—Diretór Comunidade do Pós-noviciado (CPN), Padre Ilídio Correia, Salesiano de Dom Bosco (SDB) fila hikas ba Aman Maromak nia kadunan Santu, iha sala emerjénsia Hospital Nacional Guido Valadares (HNGV) maizumenus tuku 10:45 dadeer ne’e.

Sarani iha Igreja Parokia Maria Auxiliadora Comoro, Camilo Rodrigues, hateten iha dadeer ne’e Amu konsege dirije misa.

“Iha tuku 09:00 dadeer, ha’u haree Amu Ilídio ninia kondisaun di’ak hela, hafoin to’o altár leten no halo sinál krús to’o introdusaun lee naran ne’ebé halo tinan, derepente de’it nia lian laiha no hamriik nonok kuaze minutu lima nia laran, ha’u haruka eks frater sira sa’e ba altár leten hodi kaer Amu nia liman no lori tun,” Camilo Rodrigues konta tuir, ba Agência Tatoli, iha sala mortuáriu HNGV, domingu ne’e.

Tuir sasin ne’e, molok sa’e kareta atu lori bá ospitál, Amu hatudu hela nia oin midar.

Padre Ilídio to’o iha ospitál nasionál iha tuku 09:30 no profisionál saúde sira halo tratamentu durante minutu 30 nia laran maibé la konsege salva.

Tuir informasaun, Amu hakotu iis tanba sofre moras korasaun.

Ba asuntu ne’e, jornalista tenta konfirma responsável iha sala emerjénsia maibé sira seidauk bele hato’o informasaun to’o segunda.

Amu Ilídio moris iha loron 13 outubru 1970, iha  postu administrativu Vemasse, munisípiu Baucau.

Jornalista: Domingos Piedade Freitas

Editora: Julia Chatarina

HAKEREK NO HATÁN

Please enter your comment!
Please enter your name here