Deputada Bankada KHUNTO, Olinda Guterres. Imajen Tatoli/Egas Cristovão

DILI, 18 outubru 2020 (TATOLI)–Tuir ajenda, aban (19/10), Parlamentu Nasionál (PN) liuhosi sesaun plenária sei halo votasaun ba pedidu autorizasaun ba Deputada Bankada Kmanek Haburas Unidade Nasionál Timor-oan (KHUNTO), Olinda Guterres, hodi presta deklarasaun nu’udar sasin ba kazu ida iha Hera, postu administrativu Cristo Rei, munisípiu Dili.

Ajenda ne’ebé aprova iha loron sesta (16/10) ho númeru 215/V (3a) fixa ona pedidu autorizasaun ne’e no sei halo votasaun liuhosi períudo da ordem do dia.

Deputada ne’e haktuir, kazu ne’e akontese iha fulan tolu liubá bainhira nia hala’o hela knaar .

“Momentu ne’ebá ema ataka malu no ha’u iha hela serbisu, hafoin ema ne’e hakilar dehan deputadu sira na’ok-tén, tanba ne’e ha’u kesar. Ko’alia de’it ba ha’u mesak karik di’ak maibé ko’alia refere ba deputadu hotu na’ok-tén ne’e mak ha’u kesar. Agora la’ós Parlamentu maka atu hasai imunidade maibé ha’u mak husu, nune’e bele sai sasin,” Deputada Bankada Governu ne’e informa ba Agência Tatoli,  liuhosi telemóvel, domingu ne’e.

Bainhira PN aprova pedidu autorizasaun ne’e, maka Deputada sei marka prezensa iha Tribunál iha loron 18 novembru 2020, durante oras rua nia laran, hahú tuku 09.00 dadeer.

Xefe Bankada KHUNTO prontu koopera ho justisa tanba konsidera ema hotu iha rai ne’e iha lei nia okos.

Nia hakuir, parte Komisaun A (Justisa no Konstitusionál) bolu ona nia kona-ba pedidu Tribunál nia atu sasin ba kazu ne’e no komisaun sujere atu haruka de’it karta eskrita ba Tribunál maibé Deputada ne’e hakarak ba hatán.

“Komisaun A dehan ha’u manda de’it karta eskrita maibé ha’u lakohi, ha’u hakarak hasoru Tribunál tanba ha’u mak kesar, entaun to’o tempu bolu ha’u tenke ba hatán. Ha’u lakohi liuhosi karta eskrita. La’ós hanesan sira seluk subar fali ne’e, tanba tuir lei ita hotu iha okos, atu ki’ik ka deputada fali ka tenke hatudu oin iha ne’ebá,” nia realsa.

Aleinde ne’e, deputadu sira mós sujere atu Deputada Olinda hakerek karta maibé reprezentante povu ne’e hakarak hatudu ezemplu di’ak ba seluk.

“Sira (deputadu) barak dehan ba ha’u, ama hakerek de’it karta eskrita maibé ha’u dehan lae, ha’u hakarak bá. Ha’u mak loke dalan ba sira seluk atu sira tuir ka lae,” Vise-Prezidente Komisaun D (Ekonomia no Dezenvolvimentu) ne’e akresenta.

Iha sorin seluk, Sekretária Meza PN, Deputada Lídia Norberta dos Santos Martins, dehan pedidu autorizasun ne’e depende ba plenária.

“Sim, aban sei diskute no halo votasaun ba pedidu autorizasaun ne’e maibé autoriza ka lae, ne’e depende ba plenária,” Deputada Bankada Frente Revolucionária do Timor-Leste Independente (FRETILIN) ne’e informa ba Agência Tatoli, domingu ne’e.

Nia fó-sai katak, motivu kazu sira sei anúnsia liuhosi sesaun plenária, aban.

Tuir Rejimentu Parlamentu Nasionál (RPN) artigu 8 kona-ba imunidade, deskreve pontu lima  tuirmai ne’e:

  1. Deputadu sira sei la hatán sivíl, kriminál ka disiplinarmente tanba votu no opiniaun ne’ebé sira fó kuandu hala’o sira-nia funsaun ka tanba funsaun ne’e.
  2. Laiha Deputadu ida mak bele detein ka prende preventivamente, a não ser tanba krime dolozu ne’ebé hetan pena prizaun liu tinan lima, liuhosi PN nia autorizasaun.
  3. Bainhira iha prosedimentu kriminál hasoru Deputadu ida no akuzasaun definitiva iha ona, PN sei deside se Deputadu ne’e tenke suspende ka lae hodi halo tuir prosesu ne’e.
  4. Suspensaun, bazeia ba juíz kompetente mak sei husu liuhosi dokumentu ne’ebé haruka ba Parlamentu Nasionál, ne’ebé sei hola desizaun liuhosi eskrutíniu sekretu ho maioria absoluta hosi Deputadu ne’ebé prezente, liu tiha pareser hosi komisaun kompetente.
  5. Desizaun hodi la suspende Deputadu, automatikamente prodúz efeitu atu suspende prazu ba preskrisaun ne’ebé prevee iha lei kriminál sira, kona-ba objetu akuzasaun.

Jornalista: Evaristo Soares Martins

Editora: Julia Chatarina

HAKEREK NO HATÁN

Please enter your comment!
Please enter your name here