DILI, 17 outubru 2020 (TATOLI)–Universidade Oriental Timor Lorosa’e (UNITAL) liuhosi Fakuldade Enjenária, ohin, realiza Semináriu Nasionál ho tema “Jestaun Rekursu Petrolifera iha Futuru Apos Impase Politika”.

Reitor Universidade Oriental Timor Lorosa’e (UNITAL), Florindo Pereira, hatete ema hotu-hotu hamutuk mak bele dezenvolve rekursu minerais iha Timor-Leste.

“Ita hamutuk mak bele dezenvolve ita-nia rekursu minerais iha Timor Leste. Ohin estudante no ita-nia maun sira-ne’e mak durante ne’e iha relasaun ho petróleu, nune’e jere osan oinsá mak ema atu halo servisu. Tanba ne’e mak ita presiza fahe informasaun kona-ba jestaun rekursu petrolíferu iha Timor-Leste bazea ba tema ‘Jestaun Rekursu Petrolifera iha Futuru Apos Impase Politika’,” dehan Reitór UNITAL, Florindo Pereira, iha ninia intervensain uha abertura ba semináriu nasionál iha salaun UNITAL, Becora, Dili, sábadu ne’e.

Nia dehan, iha fatin barak ka iha rai seluk halo atividade ida-ne’e sosa mak foin aprende no hatene maibé agora oradór sira-ne’e mai fahe matéria ida-ne’e ba estudante sira ne’ebé mak iha eskola kuríkulu ne’e laiha.

“Imi estudante sira sei hetan matenek sira ne’ebé mak loro-loron estadu Timor-Leste ho lina instituisaun ida-ne’e halo iha ita-nia rain,” reitór ne’e hateten.

Nia hateten, se iha dúvida ruma kona tema ba semináriu nasionál ne’e bele hato’o ba ema sira ne’ebé mak kaer área ida-ne’e, nune’e imi bele hetan buat ida-ne’ebé mak loloos no momoos.

“Oportunidade ida-ne’e di’ak ba ami no estudante hodi bele hetan informasaun hosi oradór sira tanba jerasaun tuan sira katuas tiha depois imi mak bele troka. Tanba ne’e, imi aprende didi’ak ho oradór sira ho laran di’ak bele fahe ona, iha loron bain-bain ita susar atu hasoru,” nia esklarese.

Tanba, nia dehan, Estadu nia servisu ne’e todan la halimar maibé agora aproveita tempu didi’ak atu aumenta matenek sira ne’ebé mak sira iha, para ita-boot sira mós iha esperiénsia.

“Maibé ita-nia amizade nafatin atu oinsá mak ita hamutuk dezenvolve ita-nia rain Timor-Leste espesiál iha relasaun ho rekursu minarais ne’ebé mak ita iha,” nia hateten. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here