DILI, 16 outubru 2020 (TATOLI) – Tékniku Eletrisidade de Timor-Leste (EDTL) Munisípiu Baucau, ne’ebé destakadu iha Postu Administrativu Baguia, José Afonso das Neves, ohin, purvolta tuku 11:00 Otl, ahi eletrisidade soke mate iha area Alawa, Suku Afaguia, Postu Administrativu Baguia, Munisípiu Baucau.
Tuir informasaun ne’ebé publika iha pájina rede sosiál Facebook EDTL nian katak, matebian mate kedas iha ai-riin tutun eletrisidade nian bainhira hala’o servisu atendimentu ba liña baixa tensaun (TR, sigla Inglés) .
Hosi sorin seluk, Komandante Polísia Nasionál Timor-Leste (PNTL) Munisípiu Baucau, Superintendente Xefe Armando Monteiro, ne’ebé Agência Tatoli konfirma liuhosi telefone hateten, informasaun ne’ebé Polísia rekolla katak, matebian hamutuk ho nia kolega servisu EDTL nian ida iha Baguia dezloka ba fatin akontesimentu atu ba hasa’e fiu liña TR ne’ebé monu hosi besi-riin tutun mai taka netik estrada.
Armando Monteiro hatutan, bainhira matebian hi’it-sa’e liña TR ne’e ba besi tutun maka derrepente ahi eletrisidade soke nia no mate kedas iha besi-riin nia tutun.
Momentu ne’ebá funsionáriu EDTL balun ho matebian nia primu rona halai kedas ba fatin akontesimentu no tula duni matebian iha motor Estadu nian ne’ebé matebian simu hodi evakua mai Ospitál Baguia, maibé tanba mate ona, sira lori fali matebian husi ospitál ho ambulánsia ba matebian nia knua.
Jornalista: Eugénio Pereira
Editór: Francisco Simões
