Debate públiku iha ámbitu komemorasaun tinan 45 trajédia Balibo Five komemora iha Balibo, sesta (16/10). Imajen Tatoli/Antónia Gusmão

BOBONARO, 16 outubru 2020 (TATOLI)–Ministru Asuntu Parlamentár no Komunikasaun Sosiál (MAPKOMS), Francisco Jerónimo, garante durante nia mandatu Governu sei la halo intervensaun ba kualkér publikasaun notísia mídia, tanba tuir nia direitu espresaun deskreve ona iha lei.

“Ha’u hanoin to’o oras ne’e seidauk iha presaun ruma hosi Governu ba mídia no jornalista sira katak labele halo kobertura. Iha balun ladún kontente maibé ne’e hanesan umanu ita iha regra no komunga saida maka ita hakarak atu halo espresaun ho livre, maibé imprensa iha liberdade atu hala’o nia atividade no Governu asegura nafatin,” Ministru Francisco hateten debate públiku ho tópiku ‘papél mídia iha prosesu konstrusaun Estadu’, iha ámbitu komemorasaun tinan 45 trajédia Balibo Five ne’ebé hala’o iha postu administrativu Balibo, munisípiu Bobonaro, sesta ne’e.

Nia mós garante katak Governu la impoin órgaun komunikasaun sosiál sira tenke la’o tuir Governu nia hakarak.

“Jornalista ohin loron la’ós hanoin buka apoiu hetan liberdade foun, maibé tenke tau hanoin hamutuk Estadu atu hato’o informasaun ba komunidade, eduka moris iha demokrasia no jere Estadu dezenvolve rai. Ida-ne’e papél importante ba mídia no mós bele ajuda Governu hala’o knaar di’ak liu,” nia akresenta.

Governante ne’e haktuir, iha tempu okupasaun impoen buat hotu no jornalista sira mai ho hanoin bele hetan liberdade no influénsia nasaun sira atu iha hanoin Timor-Leste tenke hetan independénsia.

“Atu hetan liberdade, ita aprende hosi pasadu sai referénsia no ohin loron ita hanoin oinsá Estadu ne’e la’o ba oin tanba ohin loron tempu liberdade no ukun-an ita aprende hodi hamosu katak liberdade imprensa ho liberdade espresaun ne’e sai savi ba Timor-Leste,” nia fó hanoin.

Iha sorin seluk, Governu liuhosi MAPKOMS prepara ona lejizlasaun atu regula utilizasaun rede sosiál ho di’ak.

“Lei sibernétika sai ona prioridade no iha prosesu laran, hein katak tinan 2022 bele iha atu regulariza rede sosiál. Ami fó prioridade tanba agora ema hotu  preokupa rede sosiál dalaruma publika hoax ataka ema ninia privasidade sein iha razaun no piór liután uza identidade falsu no aproveita liberdade no demokrasia ataka ema seluk,” nia tenik.

Tanba ne’e, Ministru konsidera presiza regulariza atu nune’e tau iha dalan loloos atu ema hotu la’o iha regra no armonia nia laran.

Aleinde ne’e, membru ezekutivu ne’e nota katak lei asesu informasaun mós importante maibé presiza estuda no halo peskiza didi’ak ba situasaun rai-laran kona-ba seguransa informasaun.

Iha fatin hanesan, eis Prezidente Repúblika, José Ramos Horta, apoia hanoin MAPKOMS tanba durante ne’e Governu seidauk deside taka mídia ruma tanba hala’o knaar la tuir Governu nia hakarak, maibé iha duni mídia balun maka deside taka tanba hasoru difikuldade finanseira.

“Ha’u koñese imprensa iha mundu tomak, ha’u bele hateten ita-nia iha liberdade imprensa tanba tuir faktu tinan 20 nia laran maizumenus laiha jornál ida taka ho ordén Governu maibé taka tanba araska ka is kotu,” eis Diplomata ne’e dehan.

Jornalista: Antónia Gusmão

Editora: Julia Chatarina 

HAKEREK NO HATÁN

Please enter your comment!
Please enter your name here